បាល់ទាត់៖ លោក Mikel Arteta អ្នកចាត់ការទូទៅក្លិបកាំភ្លើងធំ Arsenal មានទំនុកចិត្តក្នុងការរក្សាខ្សែបម្រើ Dani Ceballos របស់ក្លិប Real Madrid រហូតដល់ចប់រដូវកាលនេះ។

ខ្សែបម្រើជម្រើសជាតិអេស្ប៉ាញរូបនេះ បានផ្លាស់ទៅចូលរួមជាមួយក្លិបកាំភ្លើងធំក្នុងកិច្ចសន្យាខ្ចីជើងរយៈពេលមួយរដូវកាល ហើយនឹងអស់កុងត្រានៅពេលខាងមុខ។

ក្នុងបទសម្ភាសន៍ជាមួយកាសែត The Independent លោក Arteta បាននិយាយថា៖ “ខ្ញុំពិតជារីករាយណាស់ជាមួយគាត់ [Ceballos] ខ្ញុំសង្កេតឃើញថាគាត់សប្បាយចិត្តរាល់ការប្រកួតនិងការហ្វឹកហាត់នៅទីនេះ [Arsenal ]។ គាត់កំពុងអភិវឌ្ឍន៍សមត្ថភាពបានល្អ និងចង់បន្តនៅជាមួយក្លិប។ យើងកំពុងពិភាក្សាជាមួយ Real Madrid រឿងរក្សាគាត់ទុក”។

យ៉ាងណាមិញ តាមសេចក្តីរាយការណ៍កន្លងមកបានឲ្យដឹងថា Real Madrid បានបើកចំហរក្នុងការអនុញ្ញាតឱ្យ Ceballos ចាកចេញនៅរដូវក្តៅនេះ ដោយក្លិបកំពុងមានខ្សែបម្រើគោលជាច្រើន ដោយរួមមានដូចជា Federico Valverde, Luka Modric, Casemiro និង Toni Kroos។  Real Madrid ចង់បានយ៉ាងហោចណាស់ ៤០ លានអឺរ៉ូ ប្រសិនបើ Arsenal ចង់បាន Ceballos ជាកីឡាកររបស់ពួកគេពេញសិទ្ធនៅរដូវកាលក្រោយ៕

កែសម្រួលដោយ៖ ភារ៉ា

ប្រភព៖ football-espana

from： https://tnaot.com/km/m/detail/article/9461737