បាល់ទាត់៖ អ្នកចាត់ការទូទៅក្លិប Real Madrid លោក Zinedine Zidane នឹងបាត់បង់កម្លាំងសំខាន់ពីររូបសម្រាប់ការប្រកួតក្របខ័ណ្ឌ La Liga ជាមួយក្រុម Alaves នៅសប្តាហ៍នេះ។

ខ្សែការពារសំខាន់ពីររូបរបស់លោក Zidane ដែលនឹងត្រូវអវត្តមានការប្រកួតសប្តាហ៍នេះ នោះគឺកីឡាករ Dani Carvajal និង Sergio Ramos។ មូលហេតុនៃការអវត្តមាននេះ ដោយសារខ្សែការពារ Carvajal និង Ramos ទទួលបានកាតលឿងក្នុងមួយនាក់ចំនួន ២ សន្លឹក ២ ប្រកួតជាប់គ្នា ដែលតាមច្បាប់តម្រូវឱ្យខកខាន ១ ប្រកួត។ កាតលឿងក្នុងមួយនាក់ចំនួន ២ សន្លឹកនេះ អ្នកទាំងពីរទទួលបានពីលោកអាជ្ញាកណ្តាលក្នុងការប្រកួតជាមួយក្រុម Getafe និង Athletic Bilbao។

ក្រោយអវត្តមានកម្លាំងសំខាន់ទាំងពីរ លោក Zidane អាចនឹងដាក់កីឡាករ Nacho Fernandez និង Lucas Vazquez ឱ្យជំនួសកន្លែងរបស់ពួកគេបណ្ដោះអាសន្នសិន ខណៈពេលការប្រកួតនេះ Real Madrid ត្រូវការឈ្នះជាចាំបាច់ ដើម្បីរក្សាតំណែងកំពូលតារាង និងបន្តនាំមុខពិន្ទុក្រុម Barcelona  ដែលកំពុងចាញ់ ៤ ពិន្ទុ ត្បិតនៅសល់ម្នាក់ ៤ ប្រកួតក្នុងដៃ៕

កែសម្រួលដោយ៖ ភារ៉ា

ប្រភព៖ .football-espana

from： https://tnaot.com/km/m/detail/article/9461648