បាល់ទាត់៖ ក្លិប Liverpool ត្រៀមចុះហត្ថលេខាយកខ្សែបម្រើ Thiago Alcantara កីឡាកររបស់ក្លិប Bayern Munich នៅពេលទីផ្សារដោះដូរកីឡាកររដូវក្តៅបើកទ្វារ។ នេះបើយោងតាមរបាយការណ៍របស់កាសែតអេស្ប៉ាញ Diario Sport។

របាយការណ៍នេះអះអាងថា ក្លិប Bayern យល់ព្រមទទួលយកសំណើដែលបានផ្តល់ជូន ៣៥ លានអឺរ៉ូពីក្លិប Liverpool លើការចុះហត្ថលេខាយក Thiago នៅរដូវក្តៅនេះ។ កុងត្រារបស់កីឡាករវ័យ ២៩ ឆ្នាំនៅទឹកដី Allianz Arena នឹងផុតកំណត់នៅរដូវក្តៅឆ្នាំ២០២១។ ក្លិបបានពិភាក្សាជាមួយរូបគេពីការបន្តកិច្ចសន្យាថ្មីរួចម្តងមកហើយ ប៉ុន្តែសាមីខ្លួនបដិសេធមិនព្រមចុះកុងត្រាលេងនៅអាល្លឺម៉ង់រយៈពេលវែងទៀតទេ។

យ៉ាងណាមិញ កាសែតអាល្លឺម៉ង់ Sport Bild ក៏បានអះអាងផងដែរថា កីឡាករអន្តរជាតិអេស្ប៉ាញរូបនេះ មានបំណងចង់ចាកចេញពីក្លិបនៅរដូវក្តៅ ហើយកំពុងចាប់អារម្មណ៍លើការផ្លាស់ទៅចូលរួមជាមួយក្រុមហង្សក្រហម Liverpool នៅរដូវកាលក្រោយ៕  

កែសម្រួលដោយ៖ ភារ៉ា

ប្រភព៖ football-espana

from： https://tnaot.com/km/m/detail/article/9450671