Sign In 
រាជធានីភ្នំពេញ ៖ លោក គុជ គឹមឡុង ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ កាលពីថ្ងៃទី៦ ខែកញ្ញា ឆ្នាំ២០២០ បានឲ្យដឹងថា ក្រោយពីធ្វើការសាក
សួរសកម្មជនបរិស្ថាន៣នាក់ចប់តាមនីតិវិធី តំណាងអយ្យការព្រះរាជអាជ្ញារងអមសាលាដំបូងរាជធានីភ្នំពេញ បានសម្រេចធ្វើការចោទប្រកាន់ពួកគេទាំង៣នាក់ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម តាមបញ្ញតិ្តមាត្រា៤៩៤ នឹង៤៩៥ នៃក្រមព្រហ្មទណ្ឌ។
លោក គុជ គឹមឡុងបន្តថា ក្រោយពីមានការចោទប្រកាន់ជាផ្លូវការ សំណុំរឿងនេះបានចាត់បញ្ជូនទៅចៅក្រមស៊ើបសួរចាត់ការតាមនីតិវិធី ពោលគឺសម្រេចឃុំខ្លួនជនទាំង៣នាក់ដាក់ពន្ធនាគារជាបណ្តោះអាសន្ន ដែលមាន ១-ឈ្មោះថុន រដ្ឋា ២-កញ្ញា ឡុង គន្ធា និង៣-កញ្ញា ភួន
កែវរស្មី ។
ពួកគេទាំង៣នាក់ជាសកម្មជនបរិស្ថាននិងជាយុវជនមាតាធម្មជាតិ ក្នុងចំណោមមនុស្សប្រមាណបួនដប់នាក់ ដែលត្រូវបាននគរបាលរាជធានីភ្នំពេញឃាត់ខ្លួនកាលពីវេលាម៉ោងប្រមាណ១១ព្រឹកថ្ងៃទី៣ ខែកញ្ញា ឆ្នាំ២០២០ នៅក្នុងសង្កាត់វត្តភ្នំ ខណ្ឌដូនពេញ ពាក់ព័ន្ធនឹងការរៀបគម្រោងធ្វើដំណើរដោយថ្មើរជើងពីរមណីយដ្ឋានវត្តភ្នំឆ្ពោះទៅកាន់ភូមិគ្រឹះសម្តេចតេជោនាយករដ្ឋមន្ត្រី ហ៊ុន សែន ក្បែរវិមានឯករាជ្យ ។
ក្នុងសម្លៀកបំពាក់ពណ៌ស ពួកគេបានរំលេចពាក្យពេជ្រថា ដើម្បីស្នើសុំជួបផ្ទាល់ជាមួយសម្តេច ក្នុងគោលបំណងបង្ហាញអំពីក្តីបារម្ភមួយចំនួន ជុំវិញការលុបបឹងតាមោក បញ្ហាការជន់លិចក្នុងរាជធានីភ្នំពេញពេលមានភ្លៀងម្តងៗ ដែលជាផលប៉ះពាល់ចំពោះបរិស្ថាន ការបាត់បង់ជម្រកសត្វស្លាប រួមជាមួយជីវចម្រុះក្នុងបឹងជាដើម ៕ ផ្តល់សិទ្ធដោយ៖កោះសន្តិភាព
