Sign In 
ខេត្តសៀមរាប ៖ តាមពិតចម្លាក់នេះបានល្បីល្បាញតាមបណ្តាញ YouTube ច្រើនខែមកហើយដែរ ដែលមើលទៅដូចជា បន្ទប់គេងមួយ ដែលបំពាក់ដោយគ្រឿងសង្ហារឹមទំនើប គ្រែទំនើប មានអំពូលភ្លើង តុបតែងដោយតុ កៅអី សាឡុងប្រកបដោយក្បូរក្បាច់ ផ្សារភ្ញីគួរឲ្យគយគន់នោះ តាមពិតទៅគឺគេជីករូងដីក្រោមជារណ្តៅ បន្ទាប់មកគេឆ្លាក់ដី នៅក្នុងរណ្តៅនោះផ្ទាល់តែម្តង ។
អ្នកបង្កើតគំនិតច្នៃប្រឌិតនេះបានផ្សព្វផ្សាយស្នាដៃខ្លួន គេបណ្តាញសង្គមនេះយូរគួរសមមកហើយដែរ ។ 
ចម្លាក់ដីដោយសារការជីកទៅក្នុងដី ដែលរំលេចដោយការសូន្យរូប និងឆ្លាក់រូប ជាបន្ទប់គេង មានគ្រែ មានតុកៅអី ប្រៀបដូចជាគេហដ្ឋានត្រកូលអភិជនណាម្នាក់ និងមានរូបភាពផ្កាភ្ញីលើជញ្ជាំង ស្ថិតនៅ ក្នុងភូមិគោកតើង ឃុំចាន់ស ស្រុកសូទ្រនិគម ខេត្តសៀមរាប ដែលកសាងឡើងដោយ យុវជនពីរនាក់ជាបងប្អូននឹងគ្នារស់នៅ ភូមិរការកំបុត ឃុំត្រពាំងធំ ស្រុកប្រាសាទបាគង កំពុងទទួលការចាប់អារម្មណ៍ ជាខ្លាំងពីប្រជាពលរដ្ឋក្មេងចាស់ប្រុសស្រី ដែលរស់នៅភូមិក្បែរៗ ហើយបាននាំគ្នាទៅលេង និងថតយករូបភាពមកផុសតាមបណ្តាញសង្គមយ៉ាងសប្បាយរីករាយ ។
ក្នុងនោះផងដែរ គេសង្កេតឃើញមានបងប្អូនខ្មែរយើងជាច្រើនបានទៅដល់ទីនោះ ជាក់ស្តែងនៅថ្ងៃទី០៥ ខែកញ្ញា ឆ្នាំ២០២០នេះ លោកជំទាវឧកញ៉ាបណ្ឌិត សៀង ចាន់ហេង បានទៅដល់កន្លែងមួយនេះផងដែរដោយលោកជំទាវបានសរសេរលើបណ្តាញសង្គមមួយឃ្លានថា « បងប្អូនកូនក្មួយអើយ ធ្លាប់ឃើញតែតាមហ្វេសប៊ុក អីឡូវបានមកដល់ហើយពិតជាអស្ចារ្យណាស់ ខ្មែរអាចធ្វើបាន » ។សូមបញ្ជាក់ ៖ កាលពីថ្ងៃទី០២ ខែកញ្ញា ឆ្នាំ ២០២០ កន្លងផុតទៅ ថ្មីៗនេះមហាជនជាច្រើន ផ្ទុះការចាប់អារម្មណ៍យ៉ាងខ្លាំង ក្រោយឃើញហ្វេសប៊ុកផេកផ្លូវការមួយឈ្មោះ «មន្ទីរទេសចរណ៍ខេត្តសៀមរាប Siem Reap Provincial Tourism Departmen »បានបង្ហោះរូបភាពជាច្រើនសន្លឹកពីស្នាដៃកូនខ្មែរ ជីកកាយដីដោយផ្ទាល់ដៃ ឆ្លាក់ចេញជា បន្ទប់គេង មានគ្រែ មានតុកៅអី រហូតដល់ថ្នាក់ផ្ទុះការចាប់អារម្មណ៍យ៉ាងខ្លាំងពីសំណាក់មហាជនជាតិ និងអន្តរជាតិ ដោយសម្តែងការពេញចិត្ត គាំទ្រ និងសរសើរនូវសមិទ្ធផលទាំងនេះថា ពិតជាស្អាត រស់រវើកដូចរូបពិតៗ ៕
ផ្តល់សិទ្ធដោយ៖កោះសន្តិភាព
