Sign In 
អេស្ប៉ាញ ៖ កីឡាករ Lionel Messi បានប្រកាសជាផ្លូវការ តាមរយៈបទសម្ភាសន៍ផ្ទាល់ជាមួយ Goal.com ដោយបញ្ជាក់ថា ខ្លួននឹងបន្តលេងឲ្យ Barcelona រហូតដល់ចប់កុងត្រា ដោយរូបគេមិនចង់មានជម្លោះឈានដល់ឡើងតុលាជាមួយក្លិបឡើយ ហើយគ្រួសារគឺកត្តាដែលជំរុញឲ្យគេបន្ត។
បើទោះបីជាប្រកាសបន្តជាមួយក្លិបក៏ពិតមែន ប៉ុន្តែប្រធានក្រុមរូបនេះ បានទម្លាយមូលហេតុដែលគេព្យាយាមចាកចេញពីក្លិប ដោយបង្ហាញពីជម្លោះជាយូរមកហើយ ជាមួយប្រធានក្លិបគឺ លោក Josep Maria Bartomeu។ ដោយរូបគេបានចោទប្រកាន់ប្រធានក្លិបរូបនេះ ថា ជាមនុស្សដែលមិនគោរពពាក្យសម្តី។
ខ្សែប្រយុទ្ធអាហ្សង់ទីនវ័យ ៣៣ឆ្នាំ បានថ្លែងប្រាប់ Goal.com យ៉ាងដូច្នេះថា «ខ្ញុំបានប្រាប់ក្លិប រួមទាំងប្រធានក្លិបថា ខ្ញុំចង់ចាកចេញ។ ខ្ញុំបានប្រាប់គាត់ពេញមួយឆ្នាំ។ ដោយសារតែខ្ញុំជឿជាក់ថា ក្លិបត្រូវការកីឡាករក្មេងៗបន្ថែមទៀត។ វាមិនបានកើតឡើងដោយសារតែលទ្ធផលនៃការប្រកួតក្របខណ្ឌ Champions League ប្រឆាំងនឹងក្រុម Bayern ទេ។ ប៉ុន្តែខ្ញុំបានគិតអំពីការសម្រេចចិត្តនេះ ជាយូរមកហើយ»។
ម្ចាស់ពានរង្វាន់ Ballon d’Or ៦ សម័យកាលដដែល បានបន្តទៀតថា «គាត់តែងតែប្រាប់ខ្ញុំថា នៅចុងបញ្ចប់រដូវកាល ខ្ញុំអាចសម្រេចចិត្តថាតើទៅ ឬ នៅបាន។ ប៉ុន្តែនៅចុងក្រោយ គាត់មិនបានរក្សាពាក្យសន្យារបស់គាត់ឡើយ ដោយគាត់មិនបានផ្តល់ឲ្យខ្ញុំតម្រុយណាមួយ ដែលគាត់បាននិយាយនោះទេ»។
សូមបញ្ជាក់ថា កុងត្រារបស់ Messi ជាមួយក្លិប Barcelona នៅបញ្ចប់រដូវកាល ២០២០-២១ នៅក្នុងឆ្នាំ ២០២១ ខាងមុខ ហើយរូបគេនឹងអាចចេញពីក្លិបមួយនេះ ដោយគ្មានតម្លៃខ្លួន (Free Transfer)៕
