Sign In 
ខេត្តកណ្តាល ៖ ទីតាំងបើកម៉ាស្សាកោសជប់២៤ម៉ោងមួយកន្លែងដែលបានបង្កប់ទៅដោយសេវាផ្លូវភេទ និងការប្រើប្រាស់គ្រឿងញៀននោះ ត្រូវបានកម្លាំងសមត្ថកិច្ចនៃអធិការដ្ឋាននគរបាលក្រុងតាខ្មៅ បានឆ្មក់ចូលទៅធ្វើការបង្ក្រាប រួចហើយក៏ឃាត់ខ្លួនម្ចាស់ទីតាំងម្នាក់ និងរំដោះនារីបំរើសេវាផ្លូវភេទបានចំនួន៦នាក់ទៀតផង ។
ការបង្ក្រាបទីតាំងម៉ាស្សាកោសជប់ខាងលើនេះ បានកើតឡើងកាលពីយប់ថ្ងៃទី៣ ខែកញ្ញា ឆ្នាំ២០២០ នៅចំណុចកន្លែងកើតហេតុម៉ាស្សាយីហោ «៦៦៦» ស្ថិតនៅភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល ។ ចំណែកម្ចាស់ទីតាំងម៉ាស្សាដែលឃាត់ខ្លួនបានមានឈ្មោះ ចិន ស៊ាប ភេទស្រី អាយុ៣៧ឆ្នាំ។
បើតាមសមត្ថកិច្ចបានឱ្យបានដឹងថា មុនពេលឈានដល់ការបង្ក្រាបទីតាំងនេះ គឺមានប្រជាពលរដ្ឋល្អបានរាយការណ៍មកថា មានហាងម៉ាស្សាកោសជប់យីហោ «៦៦៦» បានបើកបង្កប់កន្លែងជួញដូរផ្លូវភេទ ទើបកម្លាំងនៃអធិការដ្ឋាននគរបាលក្រុងតាខ្មៅ សហការជាមួយកម្លាំងជំនាញប្រឆាំងការជួញដូរមនុស្ស និងការពារអនីតិជន ព្រមកម្លាំងការិយាល័យព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តកណ្តាល បានចុះបង្ក្រាបទីតាំងម៉ាស្សាកោលជប់នេះ ដោយឃាត់ខ្លួនម្ចាស់ទីតាំងម្នាក់ និងរំដោះនារីបំរើសេវាផ្លូវភេទបានចំនួន៦នាក់ទៀតផង ។
ក្នុងការបង្ក្រាបខាងលើ សមត្ថកិច្ចបានរកឃើញស្រោមអនាម័យប្រីប្រាស់រួច និងមិនទាន់ប្រើប្រាស់មួយចំនួន និងម្សៅក្រាមពណ៌សថ្លា ដែលសង្ស័យថា ជាសារធាតុញៀនមេតំហ្វេតាមីនម៉ាទឹកកក ចំនួន២កញ្ចប់តូច ព្រមទាំងឧបករណ៍សម្រាប់ប្រើប្រាស់គ្រឿងញៀនមួយចំនួនផងដែរ ។ បច្ចុប្បន្នស្ត្រីម្ចាស់ទីតាំងដែលជាជនសង្ស័យ កំពុងស្ថិតនៅកន្លែងសមត្ថកិច្ច ដើម្បីសាកសួរ និងចាត់ការតាមនីតិវិធី ៕ផ្តល់សិទ្ធដោយ៖កោះសន្តិភាព
