ត្បិតលោក Jurgen Klopp ជួយឱ្យក្លិបហង្សក្រហម Liverpool ឈ្នះជើងឯកក្របខ័ណ្ឌ Premier League នៅរដូវកាលនេះក៏ពិតមែន ប៉ុន្តែលោកមិនបានចាត់ខ្លួនឯងថាជាគ្រូបង្វឹកល្អនោះទេ ផ្ទុយទៅវិញលោក Pep Guardiola ទេ ដែលបុរសជនជាតិអាល្លឺម៉ង់វ័យ ៥៧ឆ្នាំរូបនេះ គិតថាស័ក្តិសមជាគ្រូបង្វឹកល្អបំផុត។

លោក Pep Guardiola អ្នកចាត់ការទូទៅក្លិប Manchester City បានខកខានឈ្នះជើងឯក Premier League នៅក្នុងរដូវកាលនេះ ក្រោយក្រុមរបស់លោកភ្លាត់ចាញ់ក្រុម Chelsea កាលពីសប្តាហ៍មុន ដែលធ្វើឱ្យអស់ឱកាសប្រជែងជាមួយ Liverpool ដែលបាននាំមុខរហូតដល់ទៅ ២៣ពិន្ទុរួចទៅហើយ ស្របពេលនៅសល់ ៧ប្រកួតទៀត លីគនឹងត្រូវបញ្ចប់។ គួរបញ្ជាក់ផងដែរថា កាលពីរដូវកាលមុនក្លិប Man City បានឈ្នះជើងឯកនេះរួចម្តងមកហើយនៅឆ្នាំ២០១៩។

យ៉ាងណាក៏ដោយ លោក Klopp ត្រូវបានគេសួរថា៖ «តើលោកដែលចាត់ទុកខ្លួនឯងថាជាគ្រូបង្វឹកដ៏អស្ចារ្យបំផុតរបស់ពិភពលោកដែរឬទេ»?

លោកបានឆ្លើយប្រាប់សារព័ត៌មានអាល្លឺម៉ង់ Bild ថា៖ «ខ្ញុំមិនអាចធ្វើអ្វីបានគ្រប់យ៉ាងទេ ហើយក្នុងនាមជាគ្រូបង្វឹកល្អបំផុតនៅលើពិភពលោកនោះ គឺមិនមែនខ្ញុំឡើយ។ ខ្ញុំដឹងថាគ្រូបង្វឹកទាំងអស់សុទ្ធតែល្អដូចគ្នា ប៉ុន្តែ Pep គឺជាគ្រូបង្វឹកល្អបំផុតនៅលើពិភពលោក»៕

កែសម្រួលដោយ៖ ភារ៉ា

ប្រភព៖ livescore

from： https://tnaot.com/km/m/detail/article/9433171