រថយន្ត Ford F-150 Raptor ស៊េរីថ្មីឆ្នាំ២០២១ បានខិតជិតមកដល់ហើយ គ្រាន់តែមិនទាន់ដឹងច្បាស់អំពីពេលវេលាជាក់លាក់ប៉ុណ្ណោះ ។ រថយន្តនេះ មើលទៅកំណាច​អស្ចារ្យ។ 

អ្នកនាំពាក្យរថយន្តក្រុមហ៊ុន Ford អ្នកស្រី Dawn McKenzie បានបញ្ជាក់ប្រាប់ប្រភពព័ត៌មាន Motor Authority ផ្សាយនៅថ្ងៃទី២៦ ខែមិថុនា ថា រថយន្តភីកអាប់ដែលមានសមត្ថភាពខ្លាំងអស្ចារ្យ ជាពិសេស​ការបើកបរ​នៅលើផ្លូវលំបាក​នោះ អាចនឹង​មកដល់​ឆាប់ៗនេះ​ក្នុងឆ្នាំ​២០២១នេះ ។ អ្នកស្រីថា «យើងនឹងណែនាំ Raptorថ្មីមួយ។ យើងនឹងចែករំលែកបន្ថែមទៀត នៅពេលក្រោយ» ។

ប្រភព Motor Authority បានផ្សាយទៀតថា រថយន្ត F-150 Raptor ស៊េរីថ្មី គឺច្បាស់ដូចព្រះអាទិត្យរះនៅពេលព្រឹកនោះហើយ ទោះបីជាមនុស្សជាច្រើនទស្សន៍ទាយថា ការមកដល់របស់រថយន្តដឹកទំនិញនេះ ប្រហែលអូសបន្លាយពេលមួយឆ្នាំទៀតក៏ដោយ ទម្រាំវាមកដល់នោះ ។ រឿងដូចគ្នានេះ គឺធ្លាប់បានកើតឡើងចំពោះរថយន្ត Ford Raptor ជំនាន់ចុងក្រោយ កាលណោះ Ford Raptor ប្រកាសថា បង្ហាញខ្លួននៅ​ក្នុងឆ្នាំ​២០១០ ប៉ុន្តែ​គេចាំរហូតដល់ឆ្នាំ២០១១ ទើបវា​បានមកដល់ជាក់ស្តែង ។ 

មិនមានព័ត៌មាន​ត្រូវបានគេផ្សព្វផ្សាយទូលំទូលាយ​អំពីរថយន្ត ​Ford F-150 Raptorស៊េរី​ថ្មីនោះឡើយ ។ ដៃគូប្រជែង​របស់ F-150 Raptor គឺ Ram TRXបានប្រកាស​គម្រោងចេញសម្ពោធឆាប់ៗរបស់ខ្លួន ដំណាលគ្នា​ជាមួយរថយន្ត Fordនេះផងដែរ ។ 

រថយន្ត Ford F-150 Raptor ត្រូវគេដឹងថា បំពាក់ម៉ាស៊ីន​សាំង​ចំណុះ ៣,៥​ លីត្រ Twin-Turbo V-6 កម្លាំង​​៤៥០សេះ ។ ចំណែកដៃគូប្រជែងវិញ គឺ Ram TRX បំពាក់ម៉ាស៊ីនចំណុះ​ ៦,២ លីត្រ Supercharged V-8 កម្លាំង​៧០៧​ សេះ ។ 

ការប្រណាំងប្រជែង​គឺ​គ្មានទីបញ្ចប់នោះទេ ដោយពាក្យចរចាមអារ៉ាម​ពីក្រុមហ៊ុន Ford ស្នាក់ការកណ្តាលនៅទីក្រុង​​ Dearborn ដែលផលិតរថយន្តភីកអាប់​នោះ ​បានបញ្ជាក់ថា ម៉ាស៊ីន V-8 ចំណុះ ៥,២ លីត្ររបស់ខ្លួនអាចលេចចេញជារូបរាងនៅលើ Raptor​ស៊េរីនាពេលខាងមុខ ៕ ប្រែសម្រួលដោយ៖ thach yat

from： https://tnaot.com/km/m/detail/article/9432142