Sign In 
ភ្នំពេញ ៖ បុរសពីរនាក់និងក្មេងប្រុសម្នាក់បានជិះម៉ូតូឌុបគ្នាក្នុងល្បឿនលឿនដោយចាប់ហ្រ្វាំងមិនទាន់ក៏ជ្រុលទៅបុករថយន្តបែនដឹកដីចង្កូតស្ដាំចំពីមុខពេញទំហឹងបណ្ដាលឲ្យរងរបួសធ្ងង់ទាំង៣នាក់កាលពីវេលាម៉ោង ១និង ៤០នាទីរសៀលថ្ងៃទី៣ ខែកញ្ញា ឆ្នាំ២០២០ ស្ថិតនៅផ្លូវបេតុងភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ។
អ្នកបើកបររថយន្តមាន ឈ្មោះ ទួន ពៅ ភេទប្រុស អាយុ ២២ឆ្នាំស្នាក់នៅក្រុងតាខ្មៅ ខេត្ត កណ្ដាលយោងតាមប្រភពព័ត៌មានពីប្រជាពលរដ្ឋដែលបានឃើញហេតុការណ៍បានប្រាប់ឲ្យដឹងថា មុនពេលកើតហេតុគេឃើញបុរសពីរនាក់រួមដំណើរនិងក្មេងប្រុសអាយុ៤ឆ្នាំម្នាក់ទៀត បានជិះម៉ូតូម៉ាកហុងដាឌ្រីមសង់ស៊េរីឆ្នាំ ២០១៩ ពណ៌ខ្មៅ ពាក់ស្លាកលេខភ្នំពេញ1GV-8464 តាមផ្លូវបេតុងខាងលើក្នុងល្បឿនលឿន ខណៈមកដល់ចំណុចកើតហេតុចាប់ហ្រ្វាំងមិនទាន់ជ្រុលទៅបុកជាមួយនឹងរថយន្តបែនដឹកដីចង្កូតស្ដាំដែលបានមកបញ្ច្រាសទិសចំពីមុខពេញទំហឹង បណ្តាលឲ្យមាននាក់រងរបួសធ្ងន់ ។ 
ដោយប្រជាពលរដ្ឋបានឃើញក្មេងប្រុសអាយុ៤ឆ្នាំមានសភាពធ្ងន់ធ្ងរខ្លាំងពេកក៏បានដឹកតាមម៉ូតូទៅសង្គ្រោះនៅមន្ទីរពេទ្យឯកជនដែលនៅក្បែរនោះភ្លាម ចំណែកបុរសពីរនាក់ទៀតរងរបួសធ្ងន់ក៏ត្រូវបានរថយន្តរបស់មន្ទីរពេទ្យឯកជន ដឹកយកទៅ
សង្គ្រោះតាមក្រោយ ។ 
ក្រោយពេលកើតហេតុ សមត្ថកិច្ចមូលដ្ឋានបានសហការជាមួយសមត្ថកិច្ចជំនាញចរាចរណ៍ខណ្ឌមានជ័យ ចុះទៅដល់កន្លែងកើតហេតុនិងធ្វើការវាស់វែងយករថយន្តនិងម៉ូតូទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នានៅពេលក្រោយ៕ ផេង ភាព
