Sign In 
សហរដ្ឋអាមេរិក ៖ ខណៈសល់ពេល២ខែទៀតដល់ការបោះឆ្នោតប្រធានាធិបតីអាមេរិក រដ្ឋការលោកដូណាល់ ត្រាំ កាលពីថ្ងៃទី២ កញ្ញា បានអនុវត្តការគំរាមរបស់ខ្លួនប្រឆាំងមនុស្សដែលពួកអភិរក្សនិយមអាមេរិកស្អប់ គឺរដ្ឋអាជ្ញាតុលាការព្រហ្មទណ្ឌអន្តរជាតិ CPI លោកស្រី FATOU BENSOUDA។
តុលាការ CPI បានថ្កោលទោសការដាក់ទណ្ឌកម្មនោះថា មិនអាចទទួលយកបាន និងពុំធ្លាប់មានពីមុនមក។ រដ្ឋមន្ត្រីការបរទេសអាមេរិកលោក MIKE POMPEO ថ្លែងថា ពេលនេះយើងឈានពីពាក្យសម្ដីមកជាការអនុវត្ត ព្រោះតុលាការ CPI បន្តសកម្មភាពប្រឆាំងបណ្ដាពលរដ្ឋអាមេរិក។ លោកបានប្រកាសពីការបញ្ចូលទៅក្នុងបញ្ជីខ្មៅរបស់សហរដ្ឋអាមេរិក លោកស្រី FATOU BENSOUDA រដ្ឋអាជ្ញាតុលាការ CPI និងលោក PHAKISO MOCHOCHOKO អ្នកទទួលខុសត្រូវម្នាក់ទៀតរបស់តុលាការនោះ ដែលមានទីស្នាក់ការនៅទីក្រុងឡាអេប្រទេសហូឡង់។ ទ្រព្យសម្បត្តិរបស់ពួកគេនៅអាមេរិក នឹងត្រូវផ្អឹបទុកហើយការប្រើប្រព័ន្ធហិរញ្ញវត្ថុអាមេរិករបស់ពួកគេត្រូវរាំងខ្ទប់។
ក្នុងសន្និសីទសារព័ត៌មានមួយ លោក POMPEO បានព្រមានថា រាល់បុគ្គល ឬអង្គភាព ដែលបន្តគាំទ្រអ្នកទាំងនោះ ក៏នឹងរងទណ្ឌកម្មដែរ។ យើងនឹងមិនអត់អោនដល់ការប៉ុនប៉ងខុសច្បាប់នានា របស់តុលាការ CPI ដែលចង់កាត់ទោសជនជាតិអាមេរិកឡើយ។
ដោយចេញមុខរួចហើយក្នុងការវាយលុកមួយពុំធ្លាប់មានពីមុនមក ប្រឆាំងតុលាការនេះ ប្រធានាធិបតីអាមេរិកលោកដូណាល់ ត្រាំ ធ្លាប់អនុញ្ញាតកាលពីខែមិថុនា ឲ្យដាក់ទណ្ឌកម្មខាងសេដ្ឋកិច្ច ប្រឆាំងបណ្ដាអ្នកទទួលខុសត្រូវរបស់តុលាការនោះ ពីបទបញ្ចុះបញ្ចូលឲ្យមានការតាមដានស៊ើបអង្កេតបណ្ដាទាហានអាមេរិក ដែលចូលរួម ក្នុងជម្លោះនៅអាហ្វហ្គានីស្ថាន។ ក្រុងវ៉ាស៊ិនតោនមុននេះបានហាមឃាត់រួចហើយ មិនឲ្យចូលក្នុងដែនដីអាមេរិក បណ្ដាអ្នកទទួលខុសត្រូវរបស់តុលាការ CPI និងដកទិដ្ឋាការអាមេរិក ពីលោកស្រីFATOU BENSOUDA។ តុលាការ CPI ថ្លែងថា អំពើទាំងនោះប្រឆាំងស្ថាប័នតុលាការអន្តរជាតិមួយនិងបណ្ដាមន្ត្រីស្ថាប័ននោះ ជាអំពើពុំធ្លាប់មានពីមុនមក និងជាការវាយប្រហារដ៏ធ្ងន់ធ្ងរមួយប្រឆាំងតុលាការនេះ ជាប្រព័ន្ធតុលាការព្រហ្មទណ្ឌអន្តរជាតិ៕ ផ្ដល់សិទ្ធដោយ៖ កោះសន្តិភាព
