ភ្នំពេញ ៖ ចោរឆក់វ័យក្មេងស្ទាវ២នាក់ត្រូវបាន បងប្អូនប្រជាពលរដ្ឋដេញចាប់ឃាត់ខ្លួនបាន បន្ទាប់ពីធ្វើសកម្មភាពឆក់កាបូបមិនបានសម្រេច ដួលជនរងគ្រោះ របួសបាក់ដៃ កាលពីវេលាម៉ោង១និង៣០នាទីរសៀល ថ្ងៃទី០២ ខែកញ្ញ ឆ្នាំ២០២០ នៅតាមផ្លូវ២០១១ ភូមិគោកឃ្លាង សង្កាត់គោកឃ្លាង ខណ្ឌសែនសុខ ជនសង្ស័យទាំង២នាក់ ទី១ ឈ្មោះ ជឿន សុជាតិ ភេទប្រុស អាយុ១៧ឆ្នាំ ។ ទី២ ឈ្មោះ លុយ វុទ្ធា ភេទប្រុស អាយុ១៧ឆ្នាំ ។ ទាំង២នាក់ រស់នៅភូមិអណ្តូង៦ សង្កាត់កោករការ ខណ្ឌព្រែកព្នៅ ។ ចំណែកស្ត្រីរងគ្រោះមានឈ្មោះ ខុន សុខា ភេទស្រី អាយុ៤២ឆ្នាំ មុខរបរ កម្មការនីរោងចក្រ មានទីលំនៅ ភូមិឃ្មួញ សង្កាត់ឃ្មួញ ខណ្ឌសែនសុខ 

តាមសម្តីសស្រ្ដីរងគ្រោះបានរៀបរាប់ប្រាប់អ្នកយកព័ត៌មានថា មុនកើតហេតុ ខណៈដែលជិះម៉ូតូទៅរកទិញថ្នាំពេទ្យនៅផ្សារពោធិចិនតុង ដោយធ្វើដំណើរតាមផ្លូវ២០១១ ពីជើងទៅត្បូង លុះដល់ចំណុចខាងលើ ស្រាប់តែជនសង្ស័យវ័យក្មេងខ្ចីហើយស្ទាវទៀត២នាក់ជិះម៉ូតូ ហុងដាសេ១២៥ ពាក់ស្លាកលេខ កំពត 1D-6339 តាមពីក្រោយមក

ឆក់យកកាបូបស្ពាយ តែមិនដាច់ខ្សែ ព្រោះកាបូបប្រេនៗខ្សែជាប់ស្វិតណាស់ ទើបបណ្តាលឲ្យដួលរងរបួសបាក់ដៃឆ្វេង ភ្លាមៗត្រូវបានក្រុមប្រជាពលរដ្ឋ ដេញតាមចាប់ខ្លួនបានត្រង់ចំណុចភូមិដីថ្មី ជាប់ព្រំប្រទល់ ខណ្ឌពោធិសែនជ័យ ហើយនាំជនសង្ស័យទៅប៉ុស្តិ៍កាកាប១ ខណ្ឌពោធិសែនជ័យ ជាបណ្តោះអាសន្ន ។

ជនសង្ស័យក្រោយពីសាកសួរនាំរឿងហេតុកើតឡើងនៅខណ្ឌសែនសុខ ទើបប្រគល់ជនសង្ស័យ ទៅខាងជំនាញ នាំខ្លួនយកទៅសាកសួរ និងកសាងសំណុំរឿងនៅខណ្ឌសែនសុខវិញ ៕ផេង​ ភាព

from： https://tnaot.com/km/m/detail/article/9654080