Sign In 
មនុស្សស្រីដែលចូលចិត្ដលេងសើចកំប្លុកកំប្លែងច្រើន តែមិនចូលចិត្ដយកបេះដូងមនុស្សប្រុសមកលេងសើច!
សួស្ដី! ខ្ញុំឈ្មោះ សិទ្ធិនារី ជាមនុស្សស្រីដែលចូលចិត្ដលេងសើចកំប្លុកកំប្លែងច្រើន តែមិនចូលចិត្ដយកបេះដូងមនុស្សប្រុសមកលេងសើចជាមួយទេ!
អីយាស! ឃើញសើចសប្បាយដូចផ្កាត្រូវទឹកសន្សើមអញ្ចឹង តិចថាអត់ដែរខូចចិត្ដរឿងស្នេហា បេះដូងខ្លោចផ្សារ ប្រេះស្រាំអីអញ្ចឹងទៅ! ចម្លើយគឺថា ខ្ញុំធ្លាប់ ធ្លាប់ឈឺចាប់ដោយសារស្នេហាខ្លាំងបំផុតម្ដងដែរ ជាហេតុដែលធ្វើអោយខ្ញុំគិតថា ខ្ញុំមិនត្រូវធ្វើបាបចិត្ដអ្នកដទៃដូចដែលអ្នកដទៃធ្វើបាបចិត្ដខ្ញុំនោះទេ។
និយាយមិនហែកកេរ្ដហ៍អីទេ ខ្ញុំដឹងថាមនុស្សស្រីភាគច្រើនមិនខ្វះទេអ្នកចូលមកថ្នាក់ថ្នមជំនួសតំណែងសង្សារចាស់ស្អីហ្នឹង ហើយក៏មានមនុស្សស្រីភាគច្រើនដែលទទួលអ្នកថ្មីមកធ្វើជាអ្នកកំដរដើម្បីអោយខ្លួនបំភ្លេចអ្នកចាស់តែប៉ុណ្ណោះឯង បន្ទាប់មកអាងចុងបញ្ចប់និយាយប្រាប់គេថា «សុំទោសខ្ញុំអត់ទាន់ភ្លេចសង្សារចាស់ខ្ញុំទេ ខ្ញុំយកយើងដើម្បីតែបញ្ឈឺសង្សារចាស់ខ្ញុំតែប៉ុណ្ណោះ» (គិតៗទៅអានិតមនុស្សប្រុសដែរ គេយកលេងសើចផ្លូវចិត្ដរហូត HIK HIK )។
ខ្ញុំក៏មិននិយាយបន្ទោសគេអីដែរ ព្រោះប្រហែលគេមានវិធីសាស្រ្ដកាត់ចិត្ដពីស្នេហ៍ចាស់ខុសគ្នា។
តែបើនិយាយសម្រាប់ខ្ញុំវិញ ខ្ញុំប្រហែលជាមិនជ្រើសរើសវិធីនោះមកដើម្បីអោយខ្លួនឯងសប្បាយចិត្ដ ហើយធ្វើអោយអ្នកដទៃខូចចិត្ដនោះទេ។
ហេតុអ្វីត្រូវធ្វើបាបចិត្ដអ្នកដទៃ បើខ្លួនឯងយល់ច្បាស់ពីអារម្មណ៍ឈឺចាប់ថាវាឈឺកម្រិតណាហើយហ្នឹង? បើធ្លាប់ឈឺចាប់ គួរតែប្រាប់ខ្លួនឯងថា «អ្នកនឹងមិនធ្វើអោយមនុស្សថ្មីដែលអ្នកស្រលាញ់ស្គាល់អារម្មណ៍ឈឺចាប់ដូចដែលអ្នកធ្លាប់ជួបទេ អ្នកត្រូវមើលថែគេអោយល្អបំផុតទៅតាមសមត្ថភាពដែលអ្នកធ្វើបាន!» ហើយមួយទៀត ហេតុអ្វីត្រូវធ្វើបាបចិត្ដអ្នកដទៃដើម្បីសងសឹកអ្នកចាស់ បើអ្នកចាស់ដែលធ្វើបាបអ្នកគេទៅចោលអ្នកហើយហ្នឹង! ចង់ធ្វើបាបអ្នកដែលស្រលាញ់យើងដោយសារមនុស្សមិនស្រលាញ់យើង? បានប្រយោជន៍អីបើគ្នានោះអត់ដឹងអីផងហ្នឹង?
ខ្ញុំដឹងថា ការឈឺចាប់វាពិបាកពណ៌នាណាស់ នៅពេលដែលមនុស្សដែលយើងខំថែរក្សាចិត្ដស្រលាញ់ដើម្បីគេ ចាកចេញពីយើងនោះ! អ្នកអាចខឹង អ្នកអាចសងសឹក អ្នកអាចស្អប់គេបាន តែសូមមេត្តាកុំយកជីវិតមនុស្សម្នាក់ផ្សេងទៀតដែលថែរក្សាចិត្ដស្មោះជូនអ្នក មកធ្វើជាក្រឡាអុកក្នុងវិធីសងសឹករបស់អ្នកអី!
បើមិនទាន់ច្បាស់លាស់ជាមួយនរណាម្នាក់ទេ រៀនរស់នៅម្នាក់ឯងសិនទៅ សូមកុំព្យាយាមបំផ្លាញទឹកចិត្ដ និងក្ដីស្រលាញ់របស់គេ។ ណែ! កម្មពៀរមានពិតណា!
ពីខ្ញុំ សិទ្ធិនារី !
