Sign In 
ខេត្តសៀមរាប ៖ កម្លាំងការិយាល័យនគរបាលចរាចរណ៍ផ្លូវគោកនៃស្នងការនគរបាលខេត្តសៀមរាប បានចុះរឹតបណ្តឹងច្បាប់ចរាចរណ៍ ឆែកឆេរប័ណ្ណបើកបរ និងសុវត្ថិភាព តាមដងផ្លូវជាតិលេខ៦ ខណៈពេលនោះបានធ្វើការឃាត់រថយន្តពណ៌ត្រេអ៊ីមួយគ្រឿង គ្មានស្លាកលេខ ស្រាប់តែធ្លាយឃើញសុទ្ធតែឈើ១ឡានពេញ រួចនាំយកមករក្សាទុកនៅគោលដៅសួនច្បារពីរខាងលិចដងស្ទឹងសៀមរាប មុខព្រះអង្គចេក ព្រះអង្គចម ដើម្បីទុកយកទៅប្រគល់ឱ្យមន្ត្រីជំនាញ ប៉ុន្តែដល់ម៉ោងប្រគល់ ស្រាប់តែឃើញឈើ១០ដុំប៉ុណ្ណោះ សង្ស័យមានអ្នកលួច។
ហេតុការណ៍ឃាត់រថយន្តបទល្មើសព្រៃឈើខាងលើនោះបានធ្វើឡើងកាលពីវេលាម៉ោង២និង៣០នាទីរសៀលថ្ងៃទី៣០ ខែ សីហា ឆ្នាំ២០២០ ស្ថិតនៅលើដងផ្លូវជាតិលេខ៦ ក្នុងភូមិទឹកវិល សង្កាត់ទឹកវិល ក្រុងសៀមរាប ខេត្តសៀមរាប ។
បើតាមប្រភពពីមន្ត្រីនគរបាលចរាចរាណ៍ផ្លូវគោកនៃស្នងការនគរបាលខេត្តបានលួចខ្សឹបប្រាប់ភ្នាក់ងារកោះសន្តិភាពកាលពីរសៀលថ្ងៃទី១ ខែកញ្ញាឆ្នាំ ២០២០នេះថា រថយន្តមួយគ្រឿងខាងលើម៉ាកអុីស៊ុយហ្ស៊ុយ (ISUZU) ពណ៌ត្រេអ៊ី គ្មានស្លាកលេខ ដឹកឈើពេញ ក្នុងរថយន្តបំរ៉ុងលោតឆ័ត្រ ចេញពីខេត្តសៀមរាប ទៅចែកចាយនៅខេត្តបន្ទាយមានជ័យ ប៉ុន្តែគេចមិនផុតពីសមត្ថកិច្ច ខណៈពេលនោះអ្នកបើកបរបានបើកទ្វាររថយន្តចុះរត់គេចខ្លួនបាត់ បន្សល់ទុកតែរថយន្តនៅកន្លែងកើតហេតុ។
តាមប្រភពខាងលើបានបញ្ជាក់ថា ដោយឃើញសភាពការណ៍អ្នកបើកបររត់បាត់ បន្សល់ទុកតែរថយន្ត ពេលនោះកម្លាំងក៏បានចូលទៅត្រួតពិនិត្យបើកតង់កៅស៊ូដែលគ្របពីលើរថយន្ត ឃើញសុទ្ធតែឈើ ក៏សុំគោលការណ៍ថ្នាក់លើអូសយករថយន្តនោះមករក្សាទុកនៅគោលដៅចរាចរណ៍ មុខសួច្បារពីខាងកើតដងស្ទឹងសៀមរាប ដើម្បីធ្វើការប្រគល់ជូន មន្ត្រីរដ្ឋបាលព្រៃឈើយកទៅចាត់ការបន្ត ។
តាមប្រភពបានបញ្ជាក់ទៀតថា ការប្រគល់ឈើឱ្យទៅមន្ត្រីជំនាញរដ្ឋបាលព្រៃឈើចំនួន១០ដុំ និងរថយន្តមួយគ្រឿងនោះ នៅវេលាម៉ោង៤រសៀលថ្ងៃទី១ ខែកញ្ញា ឆ្នាំ២០២០ ស្ថិតនៅបរិវេណមុខសួនច្បារ គោលដៅនគរបាលចរាចរណ៍ ផ្លូវគោកនៃស្នងការដ្ឋាននគរបាលខេត្តសៀមរាប ដើម្បីយកទៅរក្សាទុកនៅរដ្ឋបាលព្រៃឈើ ព្រះដាក់ ស្រុកបន្ទាយ ស្រី ខេត្តសៀមរាប ចាត់ការបន្តតាមនីតិវិធីច្បាប់ស្តីពីច្បាប់ព្រៃឈើ។
សូមបញ្ជាក់ថា ក្នុងរថយន្តពណ៌ត្រេអ៊ីមួយគ្រឿងខាងលើដឹកឈើពេញមួយរថយន្ត ដែលកម្លាំងនគរបាលចរាចរណ៍ផ្លូវគោកចាប់យកមកទុកនៅកន្លែងប៉ូលិសចរាចរណ៍រយៈពេល ៣ថ្ងៃ បាត់អស់ពាក់កណ្តាល នៅសល់ឈើចំនួន១០ដុំ ទុកប្រគល់ឱ្យមន្ត្រីជំនាញយកទៅរក្សាទុក និងចាត់ការបន្តតាមផ្លូវស្តីពីច្បាប់ព្រៃឈើ៕
ផ្តល់សិទ្ធដោយ៖កោះសន្តិភាព
