Sign In 
បរទេស ៖ ក្លិបកាំភ្លើងធំ Arsenal បានបញ្ចប់ការចុះហត្ថលេខាជាផ្លូវការ លើខ្សែការពារប្រេស៊ីល Gabriel Magalhaes ពីក្លិបបារាំង Lille ក្នុងតម្លៃ ២៦ លានអឺរ៉ូ ជាមួយកិច្ចសន្យារយៈពេលវែង។
កីឡាករវ័យ ២២ឆ្នាំរូបនេះ បានបង្ហាញខ្លួនចំនួន ៥២ប្រកួតនៅក្នុងការប្រកួតទាំងអស់សម្រាប់ក្រុម Lille បន្ទាប់ពីផ្លាស់ក្រុម Avaí FC នៅប្រទេសកំណើតកាលពីឆ្នាំ ២០១៧។
Gabriel បានថ្លែងចំណាប់អារម្មណ៍របស់ខ្លួន ក្រោយសម្រេចការផ្លាស់មកចូលរួមជាមួយ Arsenal យ៉ាងដូច្នេះថា «ខ្ញុំបាននិយាយច្រើនជាមួយក្រុមគ្រួសារ និងភ្នាក់ងាររបស់ខ្ញុំ។ ខ្ញុំក៏បាននិយាយជាមួយនាយកមួយចំនួនរបស់ Lille។ ប៉ុន្តែដូចអ្វីដែលខ្ញុំបាននិយាយ ប្រវត្តិសាស្ត្រ និងប្រពៃណីរបស់ក្លិប រួមជាមួយគម្រោងក្រុមសម្រាប់ ២ ទៅ ៣ ឆ្នាំខាងមុខ គឺជាការលើកទឹកចិត្តយ៉ាងខ្លាំងសម្រាប់ការសម្រេចចិត្តរបស់ខ្ញុំមកទីនេះ។ ដូច្នេះខ្ញុំនៅទីនេះ ជាមួយអាវ Arsenal ខ្ញុំនឹងផ្តល់អ្វីៗឱ្យអស់ពីសមត្ថភាព»។
ដោយឡែកងាកទៅកាន់ប្រទេសអេស្ប៉ាញវិញ ក្លិប Sevilla បានសម្រេចការចុះហត្ថលេខាសារជាថ្មី នាំយកខ្សែបម្រើសញ្ជាតិក្រូអាត Ivan Rakitic ពីគូប្រជែង Barcelona នៃក្របខណ្ឌ La Liga ជាមួយកុងត្រារយៈពេល ៤ ឆ្នាំ ក្នុងតម្លៃ ១,៥ លានអឺរ៉ូ នឹងលក្ខខណ្ឌបង់ ៩ លានអឺរ៉ូបន្ថែមទៀត នៅពេលក្រោយ។
សូមរំលឹកថា ខ្សែបម្រើកណ្តាលវ័យ ៣២ឆ្នាំរូបនេះ ធ្លាប់លេងនៅ Sevilla ចន្លោះឆ្នាំ ២០១១ ដល់ឆ្នាំ ២០១៤ មុនពេលផ្លាស់មកចូលរួមជាមួយ Barcelona ដោយបានជួយក្លិបយក្សកាតាឡាន់មួយនេះ ឈ្នះពានរង្វាន់សរុបចំនួន ១៣ ក្នុងនោះ រួមមាន La Liga ៤ លើក និង Champions League ១ លើកផងដែរ។
ផ្តល់សិទ្ធដោយ៖កោះសន្តិភាព
