Sign In 
មនុស្សដែលមានបញ្ញាអន់រមែងគិតដោះស្រាយចំពោះតែរឿងអ្វីដែលកន្លងហួសទៅហើយ ដោយមានការកើតទុក្ខ មិនសុខចិត្តចំពោះតែសកម្មភាពដែលប្រព្រឹត្តរួចហើយនោះដូចជា មានគំនិតគិតចង់បានទ្រព្យរបស់អ្នកដទៃ ឬគិតពីរឿងដែលគេស្ដីបន្ទោស ដោយរឿងគេរំលោភបំពាន និងរឿងខឹងក្រោធជាដើម ។ បើយើងសន្សំតែរឿងរ៉ាវដែលកន្លងរួចទៅហើយនោះ ចិត្តនឹងមិនស្ងប់រម្ងាប់ទេ គឺមិនអាចដោះស្រាយនូវបញ្ហាក្នុងបច្ចុប្បន្នបានឡើយ ដូច្នេះរឿងរ៉ាវដែលកន្លងហួសហើយ បំភ្លេចវាចោលទៅ ។
បើបុគ្គលឈ្វេងយល់ឲ្យបានស្គាល់បច្ចុប្បន្នច្បាស់ថាតើបច្ចុប្បន្នគឺជាអ្វី នោះយើងនឹងមិនប្រកាន់មាំឡើយ ចំពោះថា បើទោះបីបច្ចុប្បន្នវាជាពេលវេលាដែលត្រូវតាមចិត្តរបស់យើងប្រាថ្នាក៏ដោយ ក៏វាត្រឹមតែជាបច្ចុប្បន្នប៉ុណ្ណោះ ហើយវារមែងបែកធ្លាយ សោះសូន្យកន្លងទៅជាធម្មតា បើដូច្នេះតើយើងចាំបាច់ចង់បានរបស់អ្នកដទៃ ឬគិតស្តាយរឿងរ៉ាវក្នុងអតីតកាលមកធ្វើអ្វី ។
នេះជាបញ្ហាបច្ចុប្បន្នដែលមនុស្សគ្រប់រូបត្រូវដោះស្រាយប្រកបដោយបញ្ញាញាណ កុំបណ្តោយអារម្មណ៍ឱ្យវិលវល់តែក្នុងរឿងដែលកន្លងទៅនោះ ។ ផ្តល់សិទ្ធដោយ៖កោះសន្តិភាព
