ក្លិបហង្សក្រហម Liverpool បានដាក់គោលដៅចុះហត្ថលេខាយកខ្សែបម្រើ Thiago Alcantara របស់ក្លិប Bayern Munich នៅរដូវក្តៅនេះ។

បើយោងតាមសារព័ត៌មាន Sport Bild របស់អាល្លឺម៉ង់បានអះអាងថា កីឡាករអន្តរជាតិអេស្ប៉ាញរូបនេះ នឹងចាកចេញពីក្លិបម្ចាស់ជើងឯកក្របខ័ណ្ឌ Bundesliga នៅរដូវក្តៅនេះ។ កិច្ចព្រមព្រៀងរបស់កីឡាករវ័យ២៩ ឆ្នាំ នៅ Bayern នឹងផុតកំណត់នៅរដូវក្តៅឆ្នាំ២០២១ ប៉ុន្តែសាមីខ្លួនគ្មានបំណងចង់បន្តកិច្ចសន្យាថ្មីទៀតទេ ហើយបានទទូចឱ្យក្លិបផ្ទេររូបគេចេញនៅទីផ្សារកីឡារដូវក្តៅនេះបើកទ្វារ។

យ៉ាងណាមិញ ក្លិប Liverpool ត្រូវបានគេរាយការណ៍ថា កំពុងត្រៀមសំណើ៤៨លានអឺរ៉ូ ឬប្រមាណ ៥៣លានដុល្លារ បង់ទៅឱ្យ Bayern ដើម្បីនាំយកខ្សែបម្រើដែលមានបទពិសោធន៍ខ្ពស់រូបនេះ មកពង្រឹងបន្ថែមក្នុងតំបន់កណ្តាលនៅរដូវកាលក្រោយ ក្រោមការដឹកនាំរបស់លោក Jurgen Klopp។

គួរឱ្យដឹងដែរថា Thiago បានចូលរួមជាមួយ Bayern នៅឆ្នាំ២០១៣ ក្រោយចាកចេញពីក្លិប Barcelona ក្នុងតម្លៃខ្លួនផ្ទេរ ២៥លានអឺរ៉ូ ឬប្រមាណ ២៨លានដុល្លារ៕

កែសម្រួលដោយ៖ ភារ៉ា

ប្រភព៖ football-espana

from： https://tnaot.com/km/m/detail/article/9421529