ប្រធានាធិបតី​ដូណាល់ ត្រាំ បានថ្លែង​កាលពីថ្ងៃទី​២៤ ខែមិថុនា ឆ្នាំ២០២០ថា សហរដ្ឋអាមេរិក​មានផែនការ​ដកកម្លាំង​មួយចំនួន​ចេញពីអាល្លឺម៉ង់ ឲ្យទៅឈរជើងខ្លះ​នៅក្នុងប្រទេសប៉ូឡូញ ។ ការថ្លែងបែបនេះ នៅពេលដែល​លោកបានជួប​ប្រជុំជាមួយ​មេដឹកនាំ​ប៉ូឡូញ​ លោក Andrzej Duda នៅសេតវិមាន នៅមុនរយៈពេល​៤ថ្ងៃទៀតប៉ុណ្ណោះ ដែលប៉ូឡូញដល់ថ្ងៃ​រៀបចំបោះឆ្នោត​សកល ។ 

លោក ត្រាំ បានថ្លែងថា យើង​នឹងកាត់បន្ថយ​កងកម្លាំងរបស់យើង​នៅ​ប្រទេសអាល្លឺម៉ង់​ពី​៥២ ០០០ នាក់នៅត្រឹម ២៥ ០០០ នាក់ ។ កងកម្លាំងខ្លះក្នុងចំណោមនោះ វិលត្រឡប់មកមាតុភូមិ ហើយមួយចំនួនទៀត​បញ្ជូន​ទៅកាន់​ទីកន្លែង​ដទៃ​​ទៀត ។ 

មេដឹកនាំប៉ូឡូញ​បាន​ហៅ​​ការសម្រេចចិត្ត​របស់លោកដូណាល់ ត្រាំ បែបនេះថា ជាការសម្រេចចិត្តប្រកបដោយហេតុ​ផលបំផុត​មួយ ។ មេដឹកនាំប៉ូឡូញ​បានស្នើ​លោក ត្រាំ កុំដកកងកម្លាំងអាមេរិក​ចេញពី​អឺរ៉ុបធ្វើអ្វី ពីព្រោះ​បញ្ហាសន្តិសុខ​នៅតំបន់អឺរ៉ុប​ជាកិច្ចការសំខាន់​បំផុត​សម្រាប់ប៉ូឡូញ ។ 

គួរបញ្ជាក់ថា នៅថ្ងៃអាទិត្យ ទី​២៨ ខែមិថុនា ឆ្នាំ​២០២០ ប៉ូឡូញចាប់ផ្តើមបោះឆ្នោតសកល ហើយមេដឹកនាំ Andrzej Duda កំពុងស្វះស្វែង​រក​ការគាំទ្រ​ដើម្បី​ជាប់​ឆ្នោតដឹកនាំ​ប្រទេស​អាណត្តិទីពីរ ។ ប៉ុន្តែ​យ៉ាងណាក៏ដោយ ជំនួប​ជាមួយលោកដូណាល់ ត្រាំពេលនេះ គណបក្សប្រឆាំងប៉ូឡូញ​បានរិះគន់​លោក Duda ថាជាការប៉ុនប៉ង់មួយដើម្បី​អូសទាញ​អ្នកបោះឆ្នោត​ឲ្យគាំទ្រ​ខ្លួន​ ។ 

លោកដូណាល់ ត្រាំបានថ្លែងថា ប្រធានាធិបតី Duda ដឹកនាំ​បានល្អប្រសើរ​នៅក្នុងប្រទេសប៉ូឡូញ ។ គាត់កំពុង​ធ្វើកិច្ចការ​ដ៏គួរឲ្យភ្ញាក់ផ្អើល​មួយ ។

សារព័ត៌មានប៉ូឡូញ  Dziennik Gazeta Prawna បានផ្សាយថា យន្តហោះចម្បាំង F-16 ចំនួន​៣០គ្រឿងរបស់អាមេរិក ​ដែលឈរជើងនៅអាល្លឺម៉ង់​អាចនឹងបញ្ជូន​ទៅកាន់ប៉ូឡូញ ជាមួយ​កងកម្លាំង​ប្រហែល​២ ០០០ នាក់ ៕ ប្រែសម្រួលដោយ៖​ thach yat

from： https://tnaot.com/km/m/detail/article/9421462