Sign In 
ផែនការនាំចេញអង្ករ៨០ម៉ឺននៅឆ្នាំនេះសម្រេចដែរទេ ខណៈ៨ខែទើបតែបានជាង៤៤ម៉ឺនតោន ?
រាជធានីភ្នំពេញ ៖ កាលពីពីរ ឬបីខែមុននេះ សហព័ន្ធស្រូវអង្ករកម្ពុជារំពឹងថាក្នុងឆ្នាំ ២០២០ កម្ពុជាអាចនឹងនាំចេញអង្ករទៅកាន់ទីផ្សារបរទេសបានយ៉ាងហោចណាស់៨០ម៉ឺនតោន ដោយឈរលើសន្ទុះនៃការនាំចេញក្នុងរយៈពេលកន្លះឆ្នាំ ២០២០ ។
បើតាមរបាយការណ៍កន្លងមក ក្នុងរយៈពេល៦ខែដើមឆ្នាំ កម្ពុជានាំចេញអង្ករទៅកាន់ទីផ្សារបរទេសបានប្រ មាណជាង៣៩ម៉ឺនតោន ដែលមានកំណើនខ្ពស់បើធៀបនឹងរយៈពេលដូចគ្នាកាលពីឆ្នាំ២០១៩កន្លងទៅ ។ តាមរយៈកំណើននេះ សហព័ន្ធស្រូវអង្ករនិងមន្ត្រីជាន់ខ្ពស់នៃក្រសួងកសិកម្មរុក្ខាប្រមាញ់និងនេសាទ ក៏បានរំពឹងថាឆ្នាំ ២០២០នេះ យ៉ាងហោចណាស់ក៏កម្ពុជាអាចនាំចេញអង្ករទៅកាន់ទីផ្សារអន្តរជាតិក្នុងបរិមាណ៨០ម៉ឺនតោនដែរ ។ ក៏ប៉ុន្តែបើក្រលេកមកមើលតួលេខនៃការនាំចេញអង្ករក្នុងរយៈពេល៨ខែនេះឃើញថាទើបតែនាំចេញបានជាង៤៤ម៉ឺនតោនប៉ុណ្ណោះ ។
តាមរបាយការណ៍របស់អគ្គនាយកដ្ឋានកសិកម្ម អោយដឹងថា ក្នុងខែសីហា២០២០នេះ ការនាំចេញអង្កររបស់កម្ពុជាទៅកាន់ទីផ្សារអន្តរជាតិមានប្រមាណជាង២២ពាន់តោន ធៀបនឹងខែសីហាឆ្នាំមុន មានការថយចុះដល់ទៅ៣៤,៩៧ភាគរយ ។ ដូច្នេះនៅសល់៤ខែទៀត រហូតដល់ដាច់ឆ្នាំ តើកម្ពុជាអាចនឹងសម្រេចបានការនាំចេញ៨០ម៉ឺនតោនដែរទេ ?
បើតាមលោកលន់ យ៉េង អគ្គលេខាធិការសហព័ន្ធស្រូវអង្ករកម្ពុជាបានលើកឡើងថា ផែនការនាំចេញអង្ករទៅកាន់ទីផ្សារបរទេស៨០ម៉ឺនតោន ក្នុងឆ្នាំ២០២០នេះ នៅមិនទាន់ដឹងថាបានឬមិនបាននៅឡើយ ហើយរហូតមកដល់ពេលនេះ ខាងសហព័ន្ធក៏មិនទាន់អាចសន្និដ្ឋានបានៅឡើយ ។
លោកបានបន្តថា « ចាំមើលដល់ដាច់ខែកញ្ញានេះសិនទើបអាចវាយតម្លៃ បានថាតើការនាំចេញអង្ករទៅកាន់ទីផ្សារបរទេសបានសម្រេច៨០ម៉ឺនតោន ឬយ៉ាងណា »។
លោកបន្តថា ចំពោះបរិមាណធ្លាក់ចុះនៃការនាំចេញអង្ករទៅកាន់ទីផ្សារក្នុងខែសីហាកន្លងទៅនេះ គឺមិនមានទីផ្សារនាំចេញនោះទេ គឺដោយសារតែអាកាសធាតុ ព្រោះដូចបានដឹងហើយ ក្នុងខែមុនៗនេះ មានគ្រោះរាំងស្ងួតមិនអាចអោយកសិករប្រមូលផលសម្រាប់ស្តុកទុកនិងកិននាំចេញបានហើយស្រូវខ្លះត្រូវខូច ដូច្នេះហើយទើបមិនមានអង្ករដើម្បីនាំចេញ ។ សម្រាប់ទីផ្សារអង្ករកម្ពុជានៅតែមានតម្រូវការដដែល ព្រោះកុងត្រាទិញអង្ករទិញនៅច្រើនតែយើងបានលុបកុងត្រាខ្លះចោលដោយសារតែមិនមានអង្ករផ្គត់ផ្គង់អោយគេ ។
បើតាមរបាយការណ៍របស់អគ្គនាយកដ្ឋានកសិកម្ម នៃក្រសួងកសិកម្មរុក្ខាប្រមាញ់និងនេសាទ ក្នុងរយៈពេល៨ខែដើមឆ្នាំ ២០២០នេះ អង្ករកម្ពុជាបានចេញទៅកាន់គោលដៅចំនួន៥៩ប្រទេស ក្នុងនោះប្រទេសចិន ឈរលំដាប់ទី១ មានបរិមាណជាង១៥៩ពាន់តោន លំដាប់ទី២ប្រទេសបារាំងប្រមាណជាង៥៦ពាន់តោន ប្រទេសហ្គាបុង ឈរលំដាប់ទី៣ មានបរិមាណជាង៣៤ពាន់តោន ប្រទេសម៉ាឡេស៊ីលំដាប់ទី៤មានចំនួនជាង២៣ពាន់តោន ប្រទេសអូស្ត្រាលីឈរលំដាប់ទី៥មានចំនួនជាង២០ពាន់តោន ប្រទេសហូឡង់លំដាប់ទី៦មានចំនួន១៨ពាន់តោន វៀតណាមទី៧មានចំនួនជិត១៣ពាន់តោន ប្រទេសអង់គ្លេសឈរលំដាប់ទី៨មានចំនួនជាង១១ពាន់តោន ប្រទេសប្រុយណេលំដាប់ទី៩ ក្នុងបរិមាណ១០ពាន់តោនកន្លះ និងប្រទេសអេស្ប៉ាញលំដាប់ទី១០មានចំនួនជាង១០ពាន់តោន ៕ ផ្តល់សិទ្ធដោយ៖កោះសន្តិភាព
