Sign In 
ទីក្រុងមីនស្ក៍រដ្ឋធានីបេឡារុសជួបប្រទះបាតុកម្មធំលើកទី៣ ចាប់តាំងពីប្រធានាធិបតី លោកអាឡិចសាន់ដ្រ៍លូកាឆេនកូជាប់ឆ្នោតជាថ្មីទៀតមក។ នាថ្ងៃទី៣០ ខែសីហា បាតុករច្រើនម៉ឺននាក់ បានលើកគ្នាហែក្បួនតាមដងវិថីទាំងឡាយនៃរដ្ឋធានីបេឡារុស នាចុងសប្ដាហ៍ទី៣ក៏ទោះជាមានវត្តមានជាច្រើនរបស់ប៉ូលិសនិងកងយោធាដែលពាក់ម៉ាសនិងប្រដាប់អាវុធក្ដី ។ 
នេះជាបាតុកម្មដ៏ធំដែលមានអ្នកចូលរួមច្រើនជាងបាតុកម្មធំនាចុងសប្ដាហ៍មុនផង ។ យោងតាមប្រភពសារព័ត៌មាន AFP ថាការប្រមូលផ្ដុំមនុស្សតវ៉ាហាក់មានមានគ្នាច្រើនជាង២អាទិត្យមុន ដោយមនុស្សប្រមាណជា១០០.០០០នាក់បានចូលរួមដង្ហែក្បួន។ កងកម្លាំងសន្តិសុខបានធ្វើអន្តរាគមន៍ពេលចាប់ផ្ដើមបាតុកម្ម ដោយចាប់ខ្លួនមនុស្ស១២៥នាក់ ។ នោះជាការអះអាងរបស់ក្រសួងមហាផ្ទៃ ។ ប៉ូលិសមិនបានប្រើឧស្ម័នបង្ហូរទឹកភ្នែក គ្រាប់បែកធ្វើឲ្យហឹងត្រចៀកឬគ្រាប់កៅស៊ូដូចធ្លាប់ប្រើប្រឆាំងបាតុកម្មលើកមុនៗឡើយ ។
មុននេះអាជ្ញាធរបេឡារុសបានដកសិទ្ធិស្នាក់អាស្រ័យរបស់អ្នកកាសែតបរទេសជាច្រើននាក់។ តាំងពីចាប់ផ្ដើមកើតមានចលនាតវ៉ាមកបណ្ដាអ្នកកាសែតក្នុងស្រុក និងបរទេស ជាកម្មវត្ថុនៃការគាបសង្កត់និងមួយចំនួនត្រូវឃាត់ខ្លួនរយៈពេលខ្លី ៕ ដោយ៖ ត្នោត
