Sign In 
មេដឹកនាំកូរ៉េខាងជើង លោក គីម ជុងអ៊ុន បានផ្អាកផែនការសកម្មភាពយោធាប្រឆាំងនឹងកូរ៉េខាងត្បូង ។ នេះបើតាមសារព័ត៌មានកូរ៉េខាងត្បូង Yonhap បានផ្សាយ កាលពីថ្ងៃទី២៣ ខែមិថុនា ឆ្នាំ២០២០ ។
សារព័ត៌មាននេះបានដកស្រង់ប្រភពសារព័ត៌មានកណ្តាលកូរ៉េខាងជើង KCNA បានផ្សាយថា សកម្មភាពយោធាត្រូវបានផ្អាក ដោយមេដឹកនាំ គីម នៅក្នុងអំឡុងកិច្ចប្រជុំបឋមមួយរបស់គណៈកម្មការយោធាមជ្ឈិម ។
សារព័ត៌មាន KCNA បានផ្សាយថា «អំឡុងកិច្ចប្រជុំបឋម គណៈកម្មការយោធាមជ្ឈិម នៃគណបក្សពលករកូរ៉េ សូមរក្សាទុកស្ថានភាពទូទៅ និងផ្អាកសកម្មភាពយោធា ប្រឆាំងនឹងកូរ៉េខាងត្បូង ។ នេះជាកិច្ចប្រជុំលើកទី៥ នៃគណៈកម្មការយោធាមជ្ឈិមទី៧ របស់អគ្គសេនាធិការកងទ័ពប្រជាជនកូរ៉េ» ។
លោក គឹម ជុងអ៊ុន បានធ្វើជាអធិបតី នៅក្នុងកិច្ចប្រជុំនេះ តាមរយៈវីដេអូខនហ្វឺរ៉េន។ កាលពីដើមខែនេះ កូរ៉េខាងជើង ប្រកាសថា ខ្លួនអាចកាត់ផ្តាច់ទំនាក់ទំនងទាំងអស់ ក្នុងនោះរួមទាំងទំនាក់ទំនងយោធាផងដែរជាមួយកូរ៉េខាងត្បូង ហើយចាប់ផ្តើមចាត់ទុកកូរ៉េខាងត្បូងថា ជា«បច្ចាមិត្ត»មួយ ។
ទំនាក់ទំនង រវាងប្រទេសទាំងពីរកាន់តែយ៉ាប់យ៉ឺន ក្នុងរយៈពេលចុងក្រោយនេះ បន្ទាប់ពីកូរ៉េខាងត្បូងមិនអាចទប់ស្កាត់ក្រុមសកម្មជនបាចសាចខិត្តប័ណ្ណរិះគន់លោក គីម ជុងអ៊ុន ឆ្លងកាត់បន្ទាត់ព្រំដែន ។
ដើមខែមិថុនា ឆ្នាំ២០២០នេះ កូរ៉េខាងជើងបានបំផ្ទុះការិយាល័យទំនាក់ទំនងរួម ស្ថិតនៅទីក្រុងកែស៊ុង របស់កូរ៉េខាងជើង ជាការឆ្លើយតបយុទ្ធនាការបាចសាចខិត្តប័ណ្ណពីកូរ៉េខាងត្បូង ។
កាលពីថ្ងៃទី២២ ខែមិថុនា កូរ៉េខាងជើងអះអាងថា ខ្លួនបានបោះពុម្ពខិត្តប័ណ្ណ១២លានសន្លឹក ដែលគោលបំណងបាចសាច នៅកូរ៉េខាងត្បូង ដើម្បីជាយុទ្ធនាការប្រឆាំងនឹងទីក្រុងសេអ៊ូល ។ នេះបើតាមប្រភព KCNA ។
ទំនាក់ទំនងអន្តរកូរ៉េ ក៏ដូចទីក្រុងវ៉ាស៊ីនតោន និងទីក្រុងព្យុងយ៉ាង បានធ្លាក់ទៅក្នុងសភាពយ៉ាប់យ៉ឺន ចាប់តាំងពីជំនួបកំពូលលើកទី២ រវាងលោក ដូណាល់ ត្រាំ និងលោក គីម ជុងអ៊ុន កាលពីខែកុម្ភៈ ឆ្នាំ២០១៩ បានបញ្ចប់ទៅដោយពុំមានកិច្ចព្រមព្រៀងផ្លូវការ លើការរំសាយអាវុធនុយក្លេអ៊ែររបស់កូរ៉េខាងជើង ឬការបន្ធូរបន្ថយទណ្ឌកម្មរបស់អង្គការសហប្រជាជាតិ ប្រឆាំងនឹងប្រទេសនេះ ៕ ប្រែសម្រួលដោយ៖ thach yat
