Sign In 
ពំនោល៖ មានការស្រលាញ់ មានការឈឺចាប់ កើតក្តីឈឺចាប់ខ្លាំង មនុស្សក៏កើតចិត្តចង់ស្លាប់ ហេតុអី?
ខ្ញុំមិនមែនជាមនុស្សម្នាក់ដែលជ្រាលជ្រៅក្នុងវិជ្ជាស្នេហានោះទេ ប៉ុន្តែក្នុងមេរៀនមួយនេះ អាចអោយខ្ញុំទទួលដឹងពីអារម្មណ៍ខុសៗគ្នារាប់ម៉ឺនប្រភេទ។ សម្រាប់ខ្ញុំ មុខវិជ្ជាមួយនេះ ពិតជាពិបាករៀនខ្លាំងណាស់! ប៉ុន្តែចុងក្រោយ ខ្ញុំក៏រៀនសូត្រពីគ្រឹះស្ថានស្នេហាបានល្អបំផុត ហើយក៏លែងអនុញ្ញាតអោយខ្លួនឯងប្រលងធ្លាក់ម្តងហើយម្តងទៀតដូចមុនដែរ។
នៅថ្ងៃទីមួយ ដែលខ្ញុំបានចូលរៀនថ្នាក់ដំបូង វាពិតជាអស្ចារ្យខ្លាំងណាស់! គ្រូខ្ញុំ បានធ្វើអោយខ្ញុំយល់ថា ថ្នាក់រៀននេះជាពិភពលោកពណ៌ស៊ីជម្ពូរមួយដ៏ស្រស់ស្អាតបំផុត (ខ្ញុំដេកញញឹមរាល់ថ្ងៃ មិនព្រមឃ្លាតពីថ្នាក់រៀននេះឡើយ)។ ប៉ុន្តែក្រោយមក គ្រូក៏មកប្រាប់ថា វាជាពេលដែលត្រូវបន្តមេរៀនពិបាកបន្តិចហើយ គ្រូខ្ញុំតែងតែតឹងតែងលើការបង្រៀនមុខវិជ្ជាថ្មី ហើយបណ្តោយអោយខ្ញុំដោះស្រាយលំហាត់តែម្នាក់ឯង (ខ្ញុំពិតជាធុញទ្រាន់នឹងមុខវិជ្ជានេះណាស់! តែព្រោះតែខ្លាចធ្លាក់ខានបានរៀនជាមួយគ្រូ ខ្ញុំត្រូវបង្ខំអារម្មណ៍សោកសៅបន្តថ្នាក់នេះតទៅទៀត)។ រៀនយូរៗទៅ គ្រូក៏ទុកខ្ញុំចោលបណ្តោយអោយខ្ញុំរៀនដោយខ្លួនឯង គ្រូប្រាប់ថា ខ្ញុំចេះដឹងល្មមអាចចេះដឹងដោយខ្លួនឯងបានហើយ ណាមួយគ្រូមានសិស្សថ្មីផ្សេងទៀតដែលត្រូវបង្រៀនផង ដូច្នេះគ្រូគ្មានពេលគ្រប់គ្រាន់អោយខ្ញុំទៀតទេ។ បង្រៀនសិស្សថ្មីមិនបានយូរប៉ុន្មាន សិស្សថ្មីរបស់គាត់ក៏បណ្តេញខ្ញុំចេញពីថ្នាក់រៀននោះ ហើយផ្លែផ្កាមកកាន់ខ្ញុំថា «ទីនេះ អាចមានតែម្នាក់ទេ»។ ទិបំផុត ខ្ញុំក៏បាត់បង់ថ្នាក់រៀនមួយនេះជាមួយនឹងគ្រូដែលខ្ញុំចូលចិត្តបំផុត បន្សល់ទុកត្រឹមអនុស្សាវរីយ៍ល្អៗដែលធ្លាប់មានរួមគ្នា។
បញ្ចប់ថ្នាក់បឋម ខ្ញុំមានឱកាសបានរៀនបន្តថ្នាក់អនុវិទ្យាល័យ ហើយមុខវិជ្ជាថ្មីនេះរៀងខុសគ្នាតែបន្តិចប៉ុណ្ណោះពីថ្នាក់ដំបូង គ្រូខ្ញុំយកចិត្តទុកដាក់នឹងខ្ញុំណាស់ ប៉ុន្តែពេលខ្លះគ្រូនឹងខ្ញុំតែងតែធ្វើរឿងដែលថ្នាំងថ្នាក់ចិត្តគ្នារហូតគ្រូយលនឹងខ្ញុំយល់ថាហត់រៀងខ្លួន បន្ទាប់មកគ្រូក៏ស្នើអោយខ្ញុំស្វែងរកគ្រូថ្មីទៀត ព្រោះគាត់យល់ថាគាត់គ្មានលទ្ធភាពគ្រប់គ្រាន់ធ្វើជាគ្រូរបស់ខ្ញុំ ហើយពួកយើងក៏ដើរផ្លូវរៀងខ្លួន។
នៅថ្នាក់បន្ទាប់ ខ្ញុំក៏បានរៀនជាមួយគ្រូជាច្រើនផ្សេងទៀតដែលមានចំណេះ និងជំនាញខុសគ្នា ហើយខ្ញុំផ្ទាល់ក៏បានស្គាល់នុវរសជាតិជីវិតច្រើនរាប់មិនអស់ ពីមេរៀនដែលគ្រូផ្តល់អោយ…។ ខ្ញុំពិតជាមិនអាចរក្សាគ្រូវម្នាក់ណា នៅក្បែរខ្លួនបានឡើយ ព្រោះពួកគាត់មានហេតុផលរៀងៗខ្លួនក្នុងការរុញច្រានខ្ញុំចេញ ហើយចុងក្រោយខ្ញុំក៏ឆ្លាតក្នុងការដោះស្រាយសមីការគ្រប់យ៉ាងក្នុងសមីការមេរៀននេះ។
នៅពេលនេះ ខ្ញុំមានចំណេះគ្រប់គ្រាន់ពីមុខវិជ្ជាស្នេហា ហើយម្តងនេះ ខ្ញុំនឹងមិនចូលសិក្សាថ្នាក់រៀនបន្ទាប់ណាទៀតឡើយ ខ្ញុំចង់ស្វែងរកមិត្តរួមជំនាញវិញម្តង។ ខ្ញុំយល់ថា ខ្ញុំបានរៀនសូត្រច្រើនហើយពីមេរៀនទាំងអស់នោះ ដូច្នេះខ្ញុំត្រូវការមនុស្សម្នាក់ដែលមានចំណេះពីមុខវិជ្ជានេះមិនចាញ់ខ្ញុំ ហើយបន្តស្វែងយល់រួមគ្នារហូតដល់ថ្នាក់បញ្ចប់ និងសម្រេចបាននូវសញ្ញាប័ត្រសុភមង្គលមួយ៕
