Sign In 
រាជធានីភ្នំពេញ ៖ រយៈពេលចុងក្រោយនេះការវិនិយោគទៅលើអចលនទ្រព្យក្នុងប្រទេសកម្ពុជាហាក់មានសន្ទុះយ៉ាងខ្លាំងក្លាដែលមានមនុស្សជាច្រើនបានព្យាយាមទិញដីផ្ទះ ខុនដូរ ជាដើម ដើម្បីមានឱកាសលក់ចំណេញកប់ក្តោង រហូតដល់អ្នកខ្លះបានក្លាយជាអ្នកមាន ឬជាសេដ្ឋីក្នុងមួយប៉ព្រិចភ្នែក ។
ខណៈវិស័យអចលនទ្រព្យកំពុងពេញនិយម ផ្នែកវិស័យកសិឧស្សាហកម្មក៏មានសន្ទុះ និងហាក់មានការកើនឡើងនៃការបង្កបង្កើនផលពីប្រជាកសិករផងដែរ នៅក្នុងសម័យកូវីដ១៩ ។ ងាកមកមើលទីផ្សាភាគហ៊ុនវិញម្តងដែលប្រទេសជាច្រើនបានពេញនិយមលែង តែនៅកម្ពុជាហាក់មិនទាន់ទទួលបានជោគជ័យនៅឡើយ ។ ប្រាកដណាស់ បើយោងតាមការលើកឡើងរបស់ឯកទេសផ្នែកសេដ្ឋកិច្ចបានធ្វើការវិភាគដូចនេះថា «កាលអាយុ១១ឆ្នាំ លោក Warren Buffett បានវិនិយោគភាគហ៊ុនរបស់ក្រុមហ៊ុន ប្រេងចំនួន៦ហ៊ុនក្នុងតម្លៃ១ហ៊ុន៣៨ដុល្លារ ។ ក្រោយពេលវិនិយោគបាន ២-៣ សប្តាហ៍ តម្លៃហ៊ុនបានធ្លាក់ចុះយ៉ាងគំហុក គឺចុះប្រហែលជាង៣០% នៃតម្លៃដែលគាត់វិនិយោគ» ។
ង៉ែត ជូ ទីប្រឹក្សាសេដ្ឋកិច្ច និងហិរញ្ញវត្ថុនៅកម្ពុជាបានបន្តថា «បើទោះជាបងស្រីរបស់លោកតែងតែស្តីបន្ទោសយ៉ាងណាក៏លោកអត់ធ្មត់រង់ចាំរហូតតម្លៃហ៊ុនឡើងថ្លៃឡើងវិញ ហើយលក់ចេញក្នុង១ហ៊ុនតម្លៃ៤០ដុល្លារ គឺចំណេញក្នុង១ហ៊ុន២ដុល្លារ ។
ក្រោយពេលលោកលក់ហ៊ុនអស់ តម្លៃហ៊ុនបានបន្តឡើងថ្លៃយ៉ាងខ្លាំង គឺ១ហ៊ុនមានតម្លៃ២០០ដុល្លារ ។ តាមរយៈមេរៀនខាងលើភាពអត់ធ្មត់ គឺពិតជាគុណតម្លៃរបស់អ្នកវិនិយោគជោគជ័យ ។ ការរង់ចាំរហូតតម្លៃហ៊ុនងើបឡើងវិញហើយលក់ចំណេញ២ដុល្លារ ក្នុង១ហ៊ុន គឺជាការល្អ ប៉ុន្តែលោកបរាជ័យនៅត្រង់មិនបានរង់ចាំរហូតតម្លៃហ៊ុនកើនឡើងដល់២០០ដុល្លារក្នុង១ហ៊ុន»។
លោកបានបន្ថែមថា តាមបទពិសោធន៍វិនិយោគ លើវិស័យដីធ្លីនៅជាយក្រុង ដែលខ្ញុំបានអនុវត្តផ្ទាល់ជិត២០ឆ្នាំកន្លងមក គឺដូចគ្នានឹងមេរៀនដែលជាបទពិសោធន៍របស់លោក Warren Buffett អញ្ចឹង ។ 
ខ្ញុំមិនដែលខ្វល់ពេលដីធ្លាក់តម្លៃ ហើយក៏មិនត្រេកត្រអាលនឹងការកើនតម្លៃ២០% ឬ៣០%ដែរ ។ អ្វីដែលធ្វើអោយខ្ញុំពេញចិត្តនឹងការវិនិយោគ គឺការកើនតម្លៃពី៥ ទៅ១០ដងធៀបនឹងតម្លៃនៅពេលវិនិយោគបើទោះជាត្រូវការពេលវេលារង់ចាំចន្លោះពី៥ឆ្នាំទៅ១០ឆ្នាំក៏ដោយ ៕ ផ្ដល់សិទ្ធដោយ៖ កោះសន្តិភាព
