ភ្នំពេញ៖ កូនអ្នកធំជិះឡានស៊េរីទំនើបកាច់កុងដាក់គ្នា បង្កជាហិង្សាវាយតបគ្នារបួសស្នាមឈានដល់ផ្ទុះអាវុធ៣គ្រាប់ ផ្អើលដល់អ្នកធ្វើដំណើររត់ចែកជើងគ្នា លោកអធិការខណ្ឌបឹងកេងកងចុះមកអន្តគមន៍ភ្លាមៗ ហេតុការណ៍នេះបានបង្កឲ្យមានការភ្ញាក់ផ្អើលនៅវេលាម៉ោង១និង៣០នាទីរំលងអាធ្រាត ឈានចូលថ្ងៃទី៣០ខែសីហាឆ្នាំ២០២០ នៅក្បែរប៉ុស្តិ៍នគរបាលអូឡាំពិច តាមបណ្តោយផ្លូវ២៧៦ ស្ថិតក្នុងសង្កាត់អូឡាំពិច ខណ្ឌបឹងកេងកង។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុមានរថយន្តម៉ាក ម៉ាស្តារពណ៌ក្រហមស្លាកលេខភ្នំពេញ 2AA-5551 បើកបរដោយយុវជនមួយក្រុមបានមកឈប់នៅមុខឃ្លាំងមួយកន្លែងដែលស្ថិតនៅតាមបណ្តោយផ្លូវ២៧៦ខាងលើ។ ប្រភពដដែលបានបន្តទៀតថា ភ្លាមនោះស្រាប់តែមានរថយន្តម៉ាក រេងរ៉ូវើ ពណ៌ខ្មៅ 2Y-7667 ដែលមានអ្នកធ្វើដំណើរនៅក្នុងរថយន្តនោះមានស្រីមានប្រុស ស្រាប់តែមកឈប់ក្បែររថយន្ត ម៉ាស្តារដាខាងលើនោះ ហើយបុរសម្នាក់បានទៅគោះកញ្ចក់ទ្វាររថយន្ត ម៉ាស្តារដា នោះទាំងកំរោល។ បន្ទាប់ពីទាស់សម្តីគ្នា (សង្ស័យជិះឡានឌឺដងដាក់គ្នា) ស្រាប់តែមានបក្ខពួកខាងរថយន្ត ម៉ាស្តារដា ប្រមាណជាង១០នាក់បានមកវាយបុរសម្នាក់ដែលចុះមកពីរថយន្ត រេងរ៉ូវើ បណ្តាលបែកក្បាលរងរបួសយ៉ាងដំណំ ទើបមានស្នូរសម្លេងផ្ទុះកាំភ្លើង ចំនួន៣គ្រាប់ ផ្អើលរត់ចែកជើងគ្នា។ ចំណែកឯបក្ខពួក២នាក់ខាងរថយន្ត ម៉ាស្តារដាបានជិះមកដល់ចំណុច១៦៣កែង៣១០ក៏ត្រូវបានកម្លាំងសមត្ថកិច្ចល្បាតធ្វើការឃាត់ខ្លួនបានតែម្តង។

ក្រោយពេលកើតហេតុសមត្ថកិច្ចបាននាំខ្លួនភាគីទាំងសងខាងទៅកាន់អធិការដ្ឋាននគរបាលខណ្ឌបឹងកេងកងដើម្បីធ្វើការសាកសួរ៕ដោយ៖សួង សាម

from： https://tnaot.com/km/m/detail/article/9641820