សំបុកសត្វអណ្តើកសមុទ្រមួយទៀតដែលមានពងប្រហែល ៧០គ្រាប់ ត្រូវបានគេរកឃើញនៅលើកោះសាមុយកាលពីយប់ថ្ងៃសៅរ៍​ដែលធ្វើឱ្យចំនួនសំបុក​ដែលរកឃើញនៅលើកោះក្នុងឆ្នាំនេះកើនឡើងដល់ ១៧សំបុក។

អភិបាលខេត្ត​ Surat Thani លោក Wichwut Jinto បានមានប្រសាសន៍ថាការរកឃើញនេះត្រូវបានរាយការណ៍ដោយអភិបាលស្រុកកោះ Samui លោក Thiraong Chuaychu កាលពីថ្ងៃអាទិត្យ។ ​សំបុកនេះត្រូវបានរកឃើញដោយអ្នកភូមិនៅឯឆ្នេរ​ Laem So នៅទល់មុខសណ្ឋាគារ​ Ban Sai Ree ក្នុងសង្កាត់ tambon Taling Ngam មានចម្ងាយប្រហែល ១០០ម៉ែត្រពីសំបុកមួយទៀតដែលនៅខាងមុខសណ្ឋាគារ​ Villa Kalyana Koh Samui​ ។ ចាប់ពីខែកុម្ភៈមក គេរកឃើញសំបុកសត្វអំណើ្តកសមុទ្រនៅលើកោះសាមុយចំនួន១៥ ដែលក្នុងនោះមានសំបុក៥ បានរកឃើញនៅលើឆ្នេរទល់មុខសណ្ឋាគារ Banyan Tree Samui, ៥សំបុករកឃើញនៅលើឆ្នេរខាងមុខ Silavadee Pool Spa, ៦សំបុករកឃើញនៅលើឆ្នេរ Laem So និង ១សំបុកនៅលើឆ្នេរ Thong Yang។ សំបុកចំនួន៧ មានពងសរុបចំនួន ៧៥៥គ្រាប់។ ចំណែក១០សំបុកផ្សេងទៀតគេមិនបានរាប់នោះទេ ប៉ុន្តែគេរំពឹងថាវាមានពងសរុបលើសពី១០០០គ្រាប់។ ក្នុងចំណោមពងក្នុងសំបុកទាំង១៧ មានពង ២៧១គ្រាប់ហើយដែលញាស់ ចំណែកឯពងដែលនៅសល់ត្រូវគេរំពឹងថានឹងញាស់នៅចុងខែនេះ ឬអាចរហូតដល់ចុងខែសីហា។

អ្នកបរិស្ថានវិទ្យា សិក្សាផ្នែកសមុទ្រដ៏ល្បីល្បាញឈ្មោះលោក ​Thon Thamrongnawasawat សាកលវិទ្យាធិការរង​មហាវិទ្យាល័យជលផលនៃសាកលវិទ្យាល័យ Kasetsat ​បានបង្ហាញការរីករាយ​ចំពោះការរកឃើញសំបុកអណ្តើកថ្មីមួយទៀត។ កាលពីថ្ងៃចន្ទ លោក Thon ​បានបង្ហោះសារលើទំព័រហ្វេសប៊ុក​​ថា ការរកឃើញសំបុកអណ្តើកមួយទៀតគឺជាររឿងអស្ចារ្យណាស់ ហើយ​ចំនួនសំបុកទាំង ១៧ ​ដែលគេរកឃើញវាហួសពីការរំពឹងទុកទៅទៀត។ សមុទ្រនឹងមានជីវិតរស់រវើកឡើងវិញដោយសារមានមនុស្សតិច​នៅលើកោះសាមុយ។ លោកជឿជាក់ថាកូនអណ្តើក​ជាង ៥០០ក្បាល នឹងញាស់នៅលើកោះហើយពួកវាធ្វើដំណើរទៅក្នុងសមុទ្រនៅឆ្នាំនេះ។ ការបង្ហោះសាររបស់លោក​ពិតជាមានភាពទាក់ទាញ ហើយក្នុងនោះគេឃើញមានការឆ្លើយតបជាច្រើននៅលើហ្វេសប៊ុក។ អ្នកឆ្លើយតបខ្លះបាននិយាយថា ឧទ្យានសមុទ្រជាតិគួរតែ​បន្តការបិទសម្រាប់ភ្ញៀវទេសចរពី ៣ ទៅ ៦ខែក្នុងមួយឆ្នាំដើម្បីអនុញ្ញាតឱ្យធម្មជាតិមានឱកាស​បង្កើតនូវអ្វីថ្មីៗ និងបានសម្រាកលំហែដោយគ្មានការរំខានពីសំណាក់មនុស្ស។ 

កែសម្រួលដោយ៖ ភារ់ា

ប្រភព៖​ Bangkok Post

from： https://tnaot.com/km/m/detail/article/9411732