Sign In 
ហេតុការណ៍គ្រោះថ្នាក់ចរាចរណ៍មួយបានកើតឡើងកាលពីវេលាម៉ោង១១និង២០នាទីយប់ថ្ងៃទី២៩ ខែសីហា ឆ្នាំ២០២០ នៅតាមផ្លូវបេតុងបឹងតាម៉ាត ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។ ដោយបុរស ២ នាក់បងប្អូនជិះម៉ូតូមួយគ្រឿងឌុបគ្នាក្នុងល្បឿនលឿនសង្ស័យចាប់ហ្វ្រាំងមិនទាន់ក៏ជ្រុលទៅបុកជាមួយរថយន្តកូរ៉េក្នុងទិសដៅបញ្ច្រាសគ្នា បណ្តាលឲ្យយុវជនជាបងប្រុសដែលអង្គុយក្រោយបាត់បង់ជីវិត ចំណែកប្អូនប្រុសរងរបួសធ្ងន់ ។
អ្នកបើកបរម៉ូតូរងរបួសធ្ងន់ឈ្មោះទិត្យ ពណ្ណរាយ ភេទប្រុស អាយុ១៨ឆ្នាំ មុខរបរនិស្សិត ស្នាក់នៅភូមិសាមគ្គី សង្កាត់ផ្សារដេប៉ូ ខណ្ឌទួលគោក។ ចំណែកយុវជនជាបងប្រុសដែលជិះខាងក្រោយបាត់បង់ជីវិតឈ្មោះទិត្យ ចាន់សត្យា ភេទប្រុស អាយុ២០ឆ្នាំ មុខរបរនិស្សិត ស្នាក់នៅភូមិសន្សំកុសល សង្កាត់បឹងទំពុនទី១ ខណ្ឌមានជ័យ រាជធានីភ្នំពេញ ។
រីឯអ្នកបើកបររថយន្តមានឈ្មោះអេង សុហាន អាយុ៣០ឆ្នាំ មុខរបរបើកបររថយន្តមានទីលំនៅភូមិកំព្រៅ ឃុំព្នៅទី១ ស្រុកស៊ីធរកណ្ដាល ខេត្តព្រៃវែង។ 
ក្រោយពេលកើតហេតុ សមត្ថកិច្ចមូលដ្ឋានសហការជាមួយសមត្ថកិច្ចជំនាញចរាចរណ៍ខណ្ឌដង្កោក៏បានចុះដល់កន្លែងកើតហេតុនិងបានធ្វើការវាស់វែងប្រគល់រថយន្តនិងម៉ូតូរួមទាំងអ្នកបើកបរទៅអោយជំនាញនៃការិយាល័យចរាចរណ៍ផ្លូវគោកស្នងការនគរបាលរាជធានីភ្នំពេញយកទៅរក្សាទុករង់ចាំធ្វើការដោះស្រាយគ្នានៅពេលក្រោយ ចំណែកសពត្រូវបានសមត្ថកិច្ចធ្វើលិខិតប្រគល់ទៅឱ្យក្រុមគ្រួសារយកទៅធ្វើបុណ្យតាមប្រពៃណី៕ ដោយ៖ ត្នោត
