Sign In 
រាជធានីភ្នំពេញ ៖ លោក កឹម សុខា អតីតប្រធានគណបក្សសង្គ្រោះជាតិបានបន្តចុះតាមខេត្ត បន្ទាប់ពីស្ងាត់មួយរយៈពេល ក្រោយតុលាការព្រមាន ។
លោក ចាន់ ចេន មេធាវីលោក កឹម សុខា បានសរសេរលើបណ្តាញសង្គមយ៉ាងដូច្នេះថាព្រឹកថ្ងៃទី២៩ ខែសីហា ឆ្នាំ២០២០ នេះ លោក កឹម សុខា បាន យកទេយ្យទានទៅប្រគេនព្រះសង្ឃដែលគង់ចាំព្រះវស្សា និងចែកម៉ាស់ជូនប្រជាពលរដ្ឋនៅខេត្តព្រៃវែង ។
យោងតាមវីឌីអូឃ្លីបលោក ខណៈកំពុងចែកម៉ាស់ដល់ប្រជាពលរដ្ឋលោក កឹម សុខាបាននិយាយថា ចែកម៉ាស់ ដើម្បីការពារឆ្លងជំងឺកូវីដ១៩ ។ ចំណែក លោក មុត ចន្ថានាយកខុទ្ទកាល័យលោក កឹម សុខា បានលើកឡើងថា លោកប្រធាន កឹម សុខា បានយកដើមក្រញូងប្រគេនព្រះសង្ឃ និងដាំដើមក្រញូងនៅទីវត្តអារាម ដើម្បីចូលរួមអភិរក្សឈើប្រណិត និងការពារបរិស្ថានបៃតង ។
សូមជម្រាបថា កាលពីថ្ងៃទី២០ កក្កដា ឆ្នាំ២០២០ តុលាការដាស់តឿន លោកកឹម សុខា ក្រោយមើលឃើញថា ការចុះទៅខេត្តរបស់លោកអាចឈានទៅបំពានកាតព្វកិច្ច ។ ក្រុមប្រឹក្សាជំនុំជម្រះតុលាការភ្នំពេញបានចេញមកក្រើនរំឮកលោកកឹម សុខា ឱ្យគោរពបានម៉ឺងម៉ាត់នូវកាតព្វកិច្ចត្រួតពិនិត្យតាមផ្លូវតុលាការ ។ ការក្រើនរំឮកនេះ គឺបន្ទាប់ពីលោកកឹម សុខា បានធ្វើដំណើរកម្សាន្ត និងជួបជាមួយពលរដ្ឋនៅក្នុងខេត្តចំនួន៧ កាលពីពេលថ្មីៗនេះ។ សម្រាប់តុលាការក្រុងភ្នំពេញ សកម្មភាពរបស់លោក កឹម សុខានេះ អាចនឹងឈានទៅបំពានកាតព្វកិច្ចដែលកំណត់ដោយតុលាការ ។ ប៉ុន្តែ មេធាវីបានអះអាងថា លោកកឹម សុខា យល់ច្បាស់ណាស់ពីអ្វីដែលអាច និងមិនអាចធ្វើ ។
ការក្រើនរំឮករបស់តុលាការក្រុងភ្នំពេញនេះធ្វើឡើងតាមរយៈលិខិតមួយផ្ញើទៅកាន់លោកកឹម សុខា នៅថ្ងៃទី២០ ខែកក្កដា ឆ្នាំ២០២០ ។ គឺតាមលិខិតនេះតុលាការក្រុងភ្នំពេញបានប្រាប់លោកកឹម សុខា ត្រូវមានស្មារតីគោរពឱ្យបានហ្មត់ចត់ ម៉ឺងម៉ាត់ និងត្រូវប្រកាន់ភ្ជាប់នូវកាតព្វកិច្ចដែលតុលាការបានតម្រូវដាក់លើរូបលោក ។
បើតាមតុលាការ ការក្រើនរំឮកនេះ គឺដើម្បីធានាបានការគោរពចំពោះកាតព្វកិច្ចនៃការត្រួតពិនិត្យតាមផ្លូវតុលាការ ក៏ដូចជា សន្តិសុខផ្ទាល់ខ្លួន និងផលប្រយោជន៍ស្របច្បាប់របស់លោកកឹម សុខា ដែលជាជនជាប់ចោទសម្រាប់សវនាការបន្តនាពេលខាងមុខ ។
ជាមួយគ្នានោះដែរ លោកចាន់ ចេន សហមេធាវីការពារក្តីលោកកឹម សុខា បានចាត់ទុកលិខិតក្រើនរំឮករបស់តុលាការក្រុងភ្នំពេញនេះថា អាចជាការព្រមានដល់កូនក្តីរបស់លោក ។ បើតាមលោកមេធាវីចាន់ ចេន លោកកឹម សុខា តែងតែគោរពច្បាប់ទាំងពេលកន្លងមក បច្ចុប្បន្ន និងទៅអនាគត ។
លោកបានសង្កត់ធ្ងន់ថា លោកកឹម សុខា យល់ដឹងច្បាស់ណាស់នូវអ្វីដែលអាច ឬមិនអាចធ្វើ និងពេលណាគួរ ឬមិនគួរធ្វើ ។ ការក្រើនរំឮករបស់តុលាការក្រុងភ្នំពេញនាពេលនេះ ធ្វើឡើងបន្ទាប់ពីលោកកឹម សុខា ប្រធានអតីតគណបក្សសង្គ្រោះជាតិកាលពីពេលថ្មីៗកន្លងទៅនេះ បានធ្វើដំណើរកម្សាន្តទៅកាន់ខេត្តចំនួន៧រួមមាន ខេត្តត្បូងឃ្មុំ កំពង់ចាម កំពត ពោធិ៍សាត់ បាត់ដំបង សៀមរាប និងខេត្តបន្ទាយមានជ័យ ។ ដោយអមជាមួយមេធាវីទៅជាមួយផង លោកកឹម សុខា បានជួបសំណេះសំណាលប្រជាពលរដ្ឋនៅក្នុងខេត្តទាំងនេះជាហូរហែរ ។ ក៏ប៉ុន្តែសម្រាប់តុលាការក្រុងភ្នំពេញ សកម្មភាពរបស់លោក កឹម សុខានេះ អាចនឹងឈានទៅហួសព្រំដែន ឬនាំទៅដល់ការបំពានលើកាតព្វកិច្ចនៃការត្រួតពិនិត្យតាមផ្លូវតុលាការ ។ តុលាការក្រុងភ្នំពេញចង់សំដៅលើសកម្មភាពធ្វើនយោបាយដែលត្រូវបានហាមឃាត់។
ចំពោះបញ្ហានេះ លោកមេធាវីចាន់ ចេន បានអះអាងថា ការជួបជាមួយប្រជាពលរដ្ឋពេលចុះទៅខេត្តរបស់លោកកឹម សុខា គឺជាការជួបដោយចៃដន្យ និងមិនបានជួបជាមួយប្រជាពលរដ្ឋច្រើននោះទេ ហើយការជួបនេះទៀតសោតជាការសួរសុខទុក្ខធម្មតាប៉ុណ្ណោះ ។ សម្រាប់លោកមេធាវីចាន់ ចេន ការជួបរបៀបនេះមិនមែនជាសកម្មភាពនយោបាយទេ ហើយក៏មិនខុសនឹងច្បាប់ដែលហាមនោះដែរ ។ ផ្ទុយទៅវិញ បើលោក កឹម សុខា ជួបមនុស្សដែលស្រឡាញ់រាប់អានរូបលោកត្រឹមតែចំនួនតិចតួចក៏ខុសដែរនោះ វាអាចជាការបិទសេរីភាពរបស់លោកទៅវិញទេ ។
សូមបញ្ជាក់ថា លោកកឹម សុខា ត្រូវបានតុលាការដាក់ឱ្យស្ថិតក្រោមការត្រួតពិនិត្យតាមផ្លូវតុលាការដោយត្រូវគោរពតាមកាតព្វកិច្ចសំខាន់ៗចំនួន៣ គឺមិនត្រូវចេញក្រៅព្រំប្រទល់ដែនព្រះរាជាណាចក្រកម្ពុជា មិនត្រូវធ្វើសកម្មភាពនយោបាយ និងត្រូវឆ្លើយតបនឹងការកោះហៅពីគ្រប់សមត្ថកិច្ច ។ កាតព្វកិច្ចតម្រូវនេះ គឺដោយសារតែលោកកឹម សុខា ជាជនត្រូវចោទនៅក្នុងសំណុំរឿងសន្ទិដ្ឋិភាពជាមួយបរទេសដែលកំពុងស្ថិតក្នុងដំណើរការសវនាការជំនុំជម្រះនៅសាលាដំបូងរាជធានីភ្នំពេញ។ ប៉ុន្តែសវនាការនេះត្រូវបានផ្អាកជាបណ្តោះអាសន្នកាលពីចុងខែមីនាដោយសារតែជំងឺកូវីដ១៩៕ រក្សាសិទ្ធដោយកោះសន្តិភាព
