តាមសេចក្តីរាយការណ៍នៅអ៊ីតាលីបានឱ្យដឹងថា ក្លិប Fiorentina កំពុងត្រៀមចុះហត្ថលេខាយកខ្សែប្រយុទ្ធ Zlatan Ibrahimovic ពីក្លិប AC-Milan មកលេងដោយគ្មានតម្លៃខ្លួនផ្ទេរ នៅរដូវកាលក្រោយ។

តាមរបាយការណ៍របស់កាសែត La Nazione បានឱ្យដឹងថា Fiorentina មានបំណងនាំយកកីឡាករអន្តរជាតិស៊ុយអែតវ័យ៣៨ឆ្នាំរូបនេះ មកចាប់ដៃគូជាមួយកីឡាករ Franck Ribery នៅតំបន់ប្រយុទ្ធបន្ថែម។ Ibrahimovic បានផ្លាស់មកពីក្លិប La Galaxy របស់សហរដ្ឋអាមេរិកកាលពីពាក់កណ្តាលរដូវកាលនេះ ពោលគឺនៅថ្ងៃទី២ ខែមករា ឆ្នាំ២០២០។ យ៉ាងណាមិញ រូបគេនឹងត្រូវផុតកុងត្រានៅចុងខែមិថុនានេះ ហើយមិនទាន់ឮដំណឹងថា សាមីខ្លួនចង់ចុះកិច្ចសន្យាថ្មីបន្តនៅ Milan ទេ ខណៈពេលដែលរូបគេត្រូវបានផ្សាភ្ជាប់នឹងការវិលត្រឡប់ទៅកាន់ក្លិប Hammarby នៅឯប្រទេសកំណើតវិញ។

យ៉ាងណាក៏ដោយ Fiorentina នឹងទាក់ទងភ្នាក់ងារផ្ទាល់ខ្លួនរបស់ Ibrahimovic គឺលោក Mino Raiola ឱ្យជួយបញ្ចុះបញ្ចូលកីឡាកររូបនេះ ដើម្បីមានភាគរយខ្ពស់ក្នុងការចុះហត្ថលេខានៅរដូវក្តៅនេះ។ ក្រោយផ្លាស់មក Milan ខ្សែប្រយុទ្ធវ័យជ្រេរូបនេះ បង្ហាញខ្លួនបានត្រឹមតែ ៨ប្រកួតប៉ុណ្ណោះ ហើយរកគ្រាប់បាល់បញ្ចូលទីបាន ៣គ្រាប់ផងដែរ នៅក្របខ័ណ្ឌ Serie A របស់អ៊ីតាលីរដូវកាលនេះ។

កែសម្រួលដោយ៖ ភារ៉ា

ប្រភព៖ football-italia

from： https://tnaot.com/km/m/detail/article/9408491