គ្រូពេទ្យ​ម្នាក់ឈ្មោះ Susana Somali អាយុជាង​៥០ឆ្នាំ បានជួយសង្គ្រោះ​ និងចិញ្ចឹមសត្វឆ្កែអនាថា សត្វឆ្កែ​ដែល​គេនាំយកទៅសម្លាប់ជាដើម​ រហូតដល់ជាង​១ពាន់ក្បាល​ ។ សកម្មភាពនេះ​ទទួលបានការស្ងើចសរសើរជាខ្លាំងចំពោះទឹកចិត្តស្រឡាញ់​សត្វ​របស់​ស្ត្រីជាគ្រូពេទ្យ​ម្នាក់នេះ ។ 

ថ្លែងប្រាប់ប្រភពព័ត៌មាន ស្ត្រី​ជាគ្រូពេទ្យរូបនេះបញ្ជាក់ថា ​បានបង្កើតទីជម្រកសត្វឆ្កែនេះ​​ដោយដាក់ឈ្មោះហៅថា ទីជម្រក Pejaten Animal មានទីតាំងស្ថិតនៅភាគខាងត្បូង​ទីក្រុង Jakarta ប្រទេសឥណ្ឌូនេស៊ី ។ ទីជម្រកនេះ​ត្រូវបានគាត់​បង្កើតឡើង​នៅក្នុងឆ្នាំ២០០៩ ហើយរហូតមកដល់ពេលនេះ​​ បានជួលបុគ្គលិក​ប្រហែល​៣០នាក់ ​ជួយមើលថែសត្វឆ្កែ​សរុបប្រហែល​១៤០០ក្បាល ។ 

ដំណើរ​ការនេះ​ប្រព្រឹត្តទៅបាន​តាមរយៈការរៃអង្គាស​ប្រាក់​ឧបត្ថម្ភផងដែរ ។ នៅក្នុងរដូវ​កាល​កូវីដ​១៩​ឆ្លងរាតត្បាតនេះ​ទៀតនេះ ធ្វើឲ្យ​ដំណើរការ​សង្គ្រោះ​សត្វឆ្កែកាន់តែមមាញឹក ។ ពួកវា​ត្រូវបានគេបោះបង់ចោល ខណៈខ្លះទៀតត្រូវគេចាប់​យកទៅធ្វើសាច់​ជាអាហារ ។ 

ស្ត្រីជាម្ចាស់​ទីជម្រកសង្គ្រោះសត្វឆ្កែនេះ​បាន​ឲ្យដឹងថា ចំពោះសត្វឆ្កែចំណូលថ្មី គឺចំណាយ​ពេល​ប្រហែល​ជាងមួយសប្តាហ៍​ទម្រាំ​ឲ្យវា​សមនឹង​​​បរិយាកាស​នៅក្នុងជម្រកថ្មីនេះ ។  

អ្នកស្រី Susana Somali បានឲ្យដឹងថា សត្វនីមួយៗ នៅក្នុងជម្រកចិញ្ចឹមរបស់គាត់ ត្រូវការប្រាក់ប្រហែល ២៥០,០០០ រូពី ឬប្រហែលជាង១៧ដុល្លារអាមេរិក ក្នុងមួយខែ សម្រាប់អាហារ និងថ្នាំសង្កូវ ។ ក្នុងនោះ ក៏មានថ្លៃភ្លើង ថ្លៃទឹក ក៏ដូចជាប្រាក់ខែបុគ្គលិកដែលត្រូវបង់​ផងដែរ ៕ ប្រែសម្រួលដោយ៖ thach yat 

from： https://tnaot.com/km/m/detail/article/9407959