តាមសេចក្តីរាយការណ៍នៅបារាំងបានឱ្យដឹងថា ខ្សែប្រយុទ្ធ Edinson Cavani និងខ្សែការពារ Thomas Meunier មិនចង់ចុះកុងត្រារយៈពេលខ្លីបន្ថែមជាមួយក្លិប Paris Saint-Germain ដើម្បីបន្តលេងនៅក្របខ័ណ្ឌ Champions League ដល់ចុងខែសីហានេះទេ។

យោងតាមសារព័ត៌មានបារាំង ​​RMC Sport បានឱ្យដឹងថា កីឡាករ Cavani និង Meunier បានផ្តល់ដំណឹងទៅ PSG ថាពួកគេមិនចង់បន្តនៅក្នុងក្លិបឱ្យហួសថ្ងៃទី៣០ ខែមិថុនា នេះទេ ហើយនឹងត្រៀមចាកចេញក្នុងនាមជាកីឡាករគ្មានតម្លៃខ្លួនផ្ទេរ។

ដោយឡែកចំពោះ ខ្សែការពារ Layvin Kurzawa និងខ្សែប្រយុទ្ធ Choupo-Moting វិញ ក៏ស្ថិតក្នុងស្ថានភាពស្រដៀងគ្នានេះដែរ ប៉ុន្តែកីឡាករទាំងពីររូបនេះ ហាក់ចង់បន្តស្នាក់ជាមួយក្លិប PSG រហូតដល់ចុងខែសីហា បន្ទាប់មកក៏នឹងត្រូវចាកចេញដោយគ្មានតម្លៃខ្លួនផ្ទេរផងដែរ។

Meunier ត្រូវបានគេរំពឹងថានឹងផ្លាស់ទៅចូលរួមជាមួយក្លិប Borussia Dortmund ខណៈពេលដែល Cavani មិនទាន់ច្បាស់ថានឹងត្រូវផ្លាស់ទៅក្លិបណានោះទេ ប៉ុន្តែរូបគេត្រូវបានផ្សាភ្ជាប់ទៅនឹងក្លិប Inter, Napoli និង Atletico Madrid ផងដែរ។

កែសម្រួលដោយ៖ ភារ៉ា

ប្រភព៖ football-italia

from： https://tnaot.com/km/m/detail/article/9407796