ក្លិប Juventus ត្រូវបានគេរំពឹងថានឹងចុះហត្ថលេខាយកកីឡាករ Raul Jimenez ពីក្លិប Wolverhampton Wanderers ដើម្បីមកជួយសម្រួលនៅតំបន់ខាងលើ ដែលកំពុងត្រូវការកម្លាំងប្រយុទ្ធបន្ថែមនៅរដូវកាលក្រោយ។

តាមសេចក្តីរាយការណ៍របស់គេហទំព័រ Calciomercato បានឱ្យដឹងថា Juventus នឹងពឹងលោក Jorge Mendes ដែលជាភ្នាក់ងារកីឡាករ Cristiano Ronaldo ឱ្យជួយទៅទាក់ទងខ្សែប្រយុទ្ធ Jimenez ដើម្បីអាចអូសទាញរូបគេមកចូលរួមជាមួយក្លិប។ គួរបញ្ជាក់ដែរថា Wolverhampton បានទិញ Jimenez ពីក្លិប Benfica ក្នុងតម្លៃ ៤១លានអឺរ៉ូ ឬប្រមាណ ៤៥លានដុល្លារ កាលពីឆ្នាំ២០១៨។ ដូច្នេះ ប្រសិនបើក្លិបព្រមលក់វិញនោះ តម្លៃក៏មិនក្រោម ៥០លានអឺរ៉ូដែរ ព្រោះកីឡាកររូបនេះ មានសមត្ថភាពបញ្ចប់ទីមិនចាញ់ខ្សែប្រយុទ្ធ Gonzalo Higuain របស់ក្លិប Juventus ឡើយ។

យ៉ាងណាមិញ កីឡាករអន្តរជាតិម៉ិកស៊ិកវ័យ២៩ឆ្នាំរូបនេះ ក៏ត្រូវបានគេរំពឹងផងដែរថា អាចជាអ្នកមកជំនួសកន្លែងរបស់ Higuain ដែលនឹងត្រូវចាកចេញដោយគ្មានតម្លៃខ្លួន ក្រោយចប់រដូវកាលនេះ។ សម្រាប់រដូវកាលនេះ Jimenez រកគ្រាប់បាល់បញ្ចូលទីបាន ២២គ្រាប់ និងប៉ះបាល់ឱ្យមិត្តរួមក្រុមទាត់បញ្ចូលទី (Assist) ១០ដងផងដែរ ពីការបង្ហាញខ្លួនចំនួន ៤៤ប្រកួត សរុបគ្រប់ព្រឹត្តិការណ៍ទាំងអស់។

កែសម្រួលដោយ៖ ភារ៉ា

ប្រភព៖ football-italia

from： https://tnaot.com/km/m/detail/article/9407731