Sign In 
លោកមហាសេដ្ឋី ជេក ម៉ា (Jack Ma) ដែលជាស្ថាបនិករបស់ក្រុមហ៊ុន Alibaba ប្រចាំប្រទេសចិន មានទស្សនៈថា អនាគតពោរពេញទៅដោយការផ្លាស់ប្តូរ ។ លោកបានប្រាប់ដល់ CNBC កាលពីឆ្នាំ ២០១៧ ថា ក្នុងរយៈពេល ៣០ឆ្នាំខាងមុខ បច្ចេកវិទ្យា Artificial Intelligence នឹងមានសមត្ថភាពខ្ពស់ជាងចំណេះដឹងរបស់មនុស្ស ដែលបង្កឲ្យមានការបាត់បង់ការងារ ។
លោកបានបន្តទៀតថា «មនុស្សមួយចំនួនដែលអាចសម្របខ្លួនតាមការផ្លាស់ប្តូរនឹងក្លាយជាអ្នកមាន និងជោគជ័យ» ។ ប៉ុន្តែសម្រាប់អ្នកដែលមិនអាចសម្របខ្លួនបានវិញនឹងជួបការលំបាកយ៉ាងខ្លាំង ។ លោក ម៉ា បានបន្ថែមថា ក្នុងជំនាន់ដែលពោរពេញទៅដោយការផ្លាស់ប្តូរផ្នែកបច្ចេកវិទ្យានេះ ទិន្នន័យមានសារៈសំខាន់ណាស់ ។ យោងទៅតាមការព្យាករណ៍របស់លោក ទីផ្សារការងារនៅថ្ងៃអនាគតនឹងមានតម្រូវការខ្ពស់សម្រាប់ការងារដែលទាក់ទិននឹងទិន្នន័យ និងការវិភាគទិន្នន័យ ។ លោកបានបន្ថែមថា ពិភពលោកនឹងក្លាយជាទិន្នន័យ ។ ខ្ញុំគិតថា វាត្រឹមតែជាការចាប់ផ្តើមនៃជំនាន់ទិន្នន័យទេ ។ បច្ចុប្បន្ន Alibaba មានទិន្នន័យយ៉ាងទូលំទូលាយរបស់អតិថិជនរបស់ខ្លួន ដែលភាគច្រើនចូលទៅវេបសាយរបស់ក្រុមហ៊ុនជាច្រើនដងក្នុងមួយថ្ងៃ ។ ទិន្នន័យទាំងនេះបានបើកភ្នែករបស់លោក ម៉ា កាន់តែធំឲ្យមើលឃើញពិភពលោកនៅក្នុងកំឡុងពេលប៉ុន្មានទសវត្សខាងមុខ ។
លោកបានបកស្រាយទៀតថា ពួកយើងគិតថាទិន្នន័យនឹងមានសារៈសំខាន់សម្រាប់ជីវិតមនុស្សណាស់នៅថ្ងៃអនាគត ។ ថ្ងៃស្អែក អ្វីទាំងអស់នឹងមានការតភ្ជាប់ ។ លោក ម៉ា មិនមែនជាអាជីវករតែម្នាក់ដែលបានលើកឡើងពីសារៈសំខាន់នៃជំនាញវិភាគទិន្ន័យទេ ។ លោកមហាសេដ្ឋី អ៊ីឡុន ម៉ាស (Elon Musk) ដែលជានាយកប្រតិបត្តិរបស់ Tesla និង SpaceX ក៏កំពុងតែធ្វើការក្នុងគម្រោងមួយដែលមានគោលដៅតភ្ជាប់ខួរក្បាលរបស់មនុស្សជាមួយនឹងកុំព្យូទ័រដែរ ដែលនឹងបង្កើនសមត្ថភាពរបស់ខួរក្បាលមនុស្សក្នុងការវិភាគទិន្នន័យ ។ លោកមហាសេដ្ឋី ប៊ីល ហ្គេតស៍ (Bill Gates) ដែលជាសហស្ថាបនិកក្រុមហ៊ុន Microsoft បាននិយាយដែរថា សមត្ថភាពក្នុងការប្រមូលនិងប្រើប្រាស់ព័ត៌មាន នឹងផ្លាស់ប្តូរសុខភាពសាធារណៈ និងទប់ស្កាត់ការរីកសាយជំងឺដូចអ្វីដែលបានកើតឡើងកាលពីដើមឆ្នាំ ២០២០ នេះដែរ ៕ ផ្ដល់សិទ្ធដោយ៖ កោះសន្តិភាព
