សមាជិក ៤នាក់នៃក្រុមជួញដូរគ្រឿងញៀនដ៏ធំមួយនៅខេត្តភាគខាងត្បូងប្រទេសថៃត្រូវ​ចាប់ខ្លួនបានដាច់ដោយឡែកពីគ្នានៅស្រុក Muang និង Hat Yai នៃខេត្ត Songkhla ដោយមានគ្រាប់ថ្នាំចំនួន ២លានគ្រាប់  ដែលគិតជាប្រាក់មានចំនួន ៨០ប៊ីលានបាតត្រូវបានរឹបអូស​។

លោកឧត្តមសេនីយ៍ទោ​ Ronnasilp Phusara ស្នងការនគរបាលខេត្តនៃភូមិភាគទី៩ បានថ្លែងក្នុងសន្និសីទសារព័ត៌មានកាលពីថ្ងៃសុក្រថា ប៉ូលិសក៏បានរឹបអូសកាំភ្លើងខ្លីចំនួន ៣ដើម, រថយន្តដឹកទំនិញ​ ២គ្រឿង, ឡានដឹកទំនិញខ្នាតតូច ​១គ្រឿង និងទូរសព្ទដៃរបស់ជនសង្ស័យទាំង ៤នាក់។ ជនសង្ស័យត្រូវបានគេស្គាល់ឈ្មោះថា ​Arneesa Yeng អាយុ ៣០ឆ្នាំនិង ​Wisarut Almart  អាយុ ៣៤ឆ្នាំមានស្រុកកំណើតនៅស្រុក​Mayor ខេត្ត Pattani,​ Pari Mayusor អាយុ ៣៦ឆ្នាំនៅស្រុក​ Waeng ខេត្ត Narathiwat និងក្មេងជំទង់​ម្នាក់ត្រូវបានគេស្គាល់ឈ្មោះថា Apichart ​អាយុ ១៩ឆ្នាំមកពី​ស្រុក Sungai Kolok ខេត្ត Narathiwat ។ ​​ឯកឧត្តម Ronnasilp បានមានប្រសាសន៍ថា ការិយាល័យប៉ូលិសខេត្ត​ Songkhla បានតាមដានយ៉ាងយកចិត្តទុកដាក់នូវសកម្មភាពរបស់ក្រុម​ជួញដូរគ្រឿងញៀននេះចាប់តាំងពីឆ្នាំ ២០១៧ មកម្ល៉េះហើយថ្មីៗនេះប៉ូលិសទើបបានដំណឹងថាមានការរត់ពន្ធគ្រឿងញៀនខុសច្បាប់ដែល​រក្សាទុកនៅក្នុងផ្ទះជួលមួយកន្លែង​នៅស្រុក Muang ខេត្ត​ Songkhla។ ក្រោយការឆែកឆេរ មន្រ្តីជំនាញបាន​រកឃើញថ្នាំញៀនជាប្រភេទគ្រាប់ចំនួន​ ២លានគ្រាប់ច្រកនៅក្នុង​បាវ។

​ជនសង្ស័យឈ្មោះ Arneesa និង​​ Wisarut ត្រូវចាប់ខ្លួនបានរួមជាមួយនិងកាំភ្លើងខ្លី ៣ដើមនិងរបស់របរជាច្រើនទៀត​​កាលពីថ្ងៃទី១៦ ខែមិថុនា។ ដើម្បីចាប់ពួកគេទាំងពីរនាក់បាន ប៉ូលិសបានរៀបចំផែនការទូរសព្ទកក់ថ្នាំពីពួកគេចំនួន ៤០០០០០ គ្រាប់។ ចំណែកជនល្មើសពីរនាក់ទៀតត្រូវប៉ូលិសចាប់បាននៅ​ ក្នុងឃុំ tambon Khuan Lang ​ស្រុក Hat Yai។ លោកឧត្តមសេនីយ៍ឯក​ Ronnasilp បានមានប្រសាសន៍ថាគ្រឿងញៀនដែលរឹបអូសបានមានតម្លៃប្រហែល ៨០ប៊ីលានបាត​។ ករណីនេះមានជាប់ពាក់ព័ន្ធនឹងប្រទេសជិតខាងដែលឆ្លងដែនតាមរយៈស្រុក Sungai Kolok។ ប៉ូលិសកំពុងបើកការសង្កេតរឿងក្តីនេះបន្ថែមទៀត។ 

កែសម្រួលដោយ៖ ភារ៉ា

ប្រភព៖ Bangkok Post

from： https://tnaot.com/km/m/detail/article/9407320