Sign In 
ត្រឹមមួយថ្ងៃសុក្រ មនុស្សជាង ៦០០នាក់ ត្រូវធ្វើតេស្តរកកូវីដ ១៩ តែគ្មានរកឃើញករណីឆ្លងថ្មីទេ
គិតត្រឹមព្រឹកថ្ងៃសៅរ៍នេះ កម្ពុជានៅតែរក្សាបានតួលេខឆ្លងកូវីដ ១៩ ត្រឹម ១២៩ករណីដដែល ដោយមិនបានរកឃើញករណីឆ្លងថ្មីណាមួយនោះឡើយ។
យោងតាមរបាយការណ៍ចេញផ្សាយដោយនាយកដ្ឋានប្រយុទ្ធនឹងជំងឺឆ្លង CDC ចំនួនអ្នកឆ្លងកូវីដ ១៩ នៅកម្ពុជា មានសរុប ១២៩នាក់ ជាស្ត្រី ៣៩នាក់ និងជាបុរស ៩០នាក់ ក្នុងនោះ ១២៦នាក់ បានជាសះស្បើយរួចមកហើយ នៅសេស ៣នាក់ទៀត កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ដោយមិនមានករណីស្លាប់នោះឡើយ។
បើទោះជាមិនរកឃើញករណីឆ្លងថ្មីក៏ពិតមែន ប៉ុន្តែមន្ត្រីជំនាញ នៅតែបន្តអនុវត្តវិធានការដាក់ឲ្យនៅដាច់ដោយឡែកសម្រាប់អ្នកចំណូលថ្មី ដោយគិតមួយថ្ងៃសុក្រម្សិលមិញ កម្ពុជាបានពិនិត្យរកមេរោគកូវីដ ១៩ សរុបដល់ទៅ ៦៥៣នាក់បន្ថែមទៀត នាំឲ្យការពិនិត្យរកកូវីដ ១៩ សរុបនៅកម្ពុជាមានដល់ទៅ ៣០ ៥៦៨នាក់ ស្មើនឹង ១ ៨៤១នាក់ ក្នុង ១លាននាក់។
ទោះបីជាស្ថានភាពកូវីដ ១៩ ហាក់ធូរស្រាលខ្លាំង ប៉ុន្តែរដ្ឋាភិបាល ក៏ដូចជាក្រសួងពាក់ព័ន្ធនៅតែអនុវត្តវិធានការការពារយ៉ាងម៉ឺងម៉ាត់ និងអំពាវឲ្យពលរដ្ឋទាំងអស់ចូលរួមការពារខ្លួន និងក្រុមគ្រួសារពីការចម្លងកូវីដ ១៩ តាមរយៈរក្សាគម្លតសង្គម ធ្វើអនាម័យឲ្យបានត្រឹមត្រូវ៕ ដោយ៖ ត្នោត
