Sign In 
ខេត្តតាកែវ ៖ ស្រុកអង្គបូរី ខេត្តតាកែវ ជាទឹកដីដែលល្បីល្បាញថា មានបង្កងធម្មជាតិ មានរសជាតិឈ្ងុយឆ្ងាញ់ ។ រសជាតិបង្កងធម្មជាតិនៅអង្គបូរី បានធ្វើឲ្យពលរដ្ឋមួយចំនួនដែលនិយមទទួលទានបង្កង តែងធ្វើដំណើរទៅកាន់ទឹកដីជាប់ព្រំដែនវៀតណាមមួយនេះ ដើម្បីទទួលទានបង្កង ដែលជាប្រភពចំណូលដ៏សំខាន់មួយដល់អាជីវករ និងពលរដ្ឋអ្នកនេសាទនៅទីនោះ ។
ជាទម្លាប់បង្កងសម្បូរនៅនៅក្នុងវិច្ឆិកា ពេលរដូវទឹកដំឡើងជន់លិចព្រៃ លិចបឹង ។ ប៉ុន្តែនៅឆ្នាំនេះ ប្រជាពលរដ្ឋនៅស្រុកអង្គបូរីហាក់បានសម្តែងក្តីអស់សង្ឃឹមជាមុនថា បង្កងអាចនឹងមិនសម្បូរទេ ហើយអាចនឹងប៉ះសេដ្ឋកិច្ចគ្រួសារផងដែរ ព្រោះបើបង្កងខ្សត់ក៏អាចបាត់បង់ចំណូលមួយផ្នែកធំ ។ យ៉ាងណាមិញ មានកត្តាជាច្រើនដែលពលរដ្ឋហ៊ានសន្និដ្ឋានជុំវិញរឿងបង្កងអាចខ្សត់នៅឆ្នាំនេះ ពីព្រោះការរុករានទន្ទ្រានព្រៃលិចទឹកដែលជាជម្រកត្រីកាន់តែមានទំហំធំឡើងការនេសាទខុសច្បាប់កាន់តែសម្បូរ ។ តាមពិតទៅពលរដ្ឋសង្កេតឃើញថា ទិន្នផលបង្កងបានថយចុះរយៈប៉ុន្មានឆ្នាំចុងក្រោយនេះ ។ បើទោះបីជាពេលនេះរដូវនេសាទបង្កងមិនទាន់ដល់ក្តី ប្រសិនជាគេធ្វើដំណើរទៅកាន់ស្រុកអង្គបូរី ពិតជាមិនខ្វះបង្កងទទួលទានឡើយ ប៉ុន្តែជាបង្កងដែលកំពុងដាក់លក់នាពេលនេះភាគច្រើនជាបង្កងនាំចូលពីប្រទេសវៀតណាម ។
ពលរដ្ឋដែលជាអាជីវករលក់ចំណីអាហារនៅជុំវិញរមណីដ្ឋានភ្នំបូរី និយាយថា ពួកគាត់គិតថា បង្កងឆ្នាំនេះមិនសម្បូរទេ ។ ក្រៅពីហេតុផលដូចបានលើកឡើងពីខាងលើ ពលរដ្ឋបញ្ជាក់ថា ឆ្នាំនេះទឹកទំនងជាតូចទៀត ដែលជាមូលហេតុសំខាន់មួយ ធ្វើឲ្យបង្កងខ្សត់ ។ ជាមធ្យមបង្កងប្រភេទលេខមួយ ជាបង្កងធម្មជាតិ អាចលក់បាន២០ម៉ឺនរៀលក្នុងមូយគីឡូក្រាម ចំណែកបង្កងនាំចូលមួយគីឡូក្រាមមានតម្លៃចាប់ពី១០ដុល្លារឡើងទៅ។ ប៉ុន្តែបញ្ហានៅត្រង់ថា បង្កងធម្មជាតិ ឬបង្កងចិញ្ចឹមនាំចូលពីប្រទេសវៀតណាម ពិបាកសម្គាល់និងចំណាំ ហើយអ្នកលក់ជាទូទៅតែងតែអះអាងថាជា បង្កងធម្មជាតិ៕ ផ្ដល់សិទ្ធដោយ៖ កោះសន្តិភាព
