Sign In 
តាមសេចក្តីរាយការណ៍ បុរសម្នាក់មានជំងឺធំពោះប្រចាំកាយរីងរ៉ៃជាយូរឆ្នាំគ្មានលទ្ធភាពទៅពេទ្យព្យាបាលនោះទេទម្រាំតែឪពុកដាច់ចិត្តដឹកកូនប្រុសតាមរថយន្តតាក់ស៊ីពីខេត្តព្រៃវែងមកបន្តព្យាបាលនៅភ្នំពេញ កូនរបស់គាត់បានដាច់ខ្យល់តាមផ្លូវបាត់ទៅហើយ ។ 
ម្ចាស់តាក់សុីបានដាក់សពចុះតាមផ្លូវ បណ្តាលអោយមានការភ្ញាក់ផ្អើលកាលពីម៉ោង11យប់ ថ្ងៃទី25 ខែសីហា ឆ្នាំ2020 នៅតាមបណ្ដោយផ្លូវ317 ទល់មុខនឹងវិទ្យាល័យឥន្ទ្រទេវី ក្នុងសង្កាត់បឹងកក់2 ខណ្ឌទួលគោក។
ឪពុកសពជនរងគ្រោះបានប្រាប់បន្ថែមថា កូនប្រុសរបស់គាត់មានជំងឺប្រចាំកាយជាយូរឆ្នាំមកហើយ គឺពោះហើមធំឡើងៗពីមួយថ្ងៃទៅមួយថ្ងៃ តែគ្រួសារគាត់ក្រីក្រ គ្មានលទ្ធភាពនាំកូនប្រុសទៅព្យាបាលនៅមន្ទីរពេទ្យនោះទេ។ ពុកជនរងគ្រោះបន្តថា ក្រោយមកពួកគាត់ក៏សម្រេចចិត្តព្យាបាលនៅផ្ទះដោយរកគ្រូខ្មែរ និងគ្រូពេទ្យក្នុងស្រុកព្យាបាលតាមលទ្ធភាពដែលមាន ប៉ុន្តែអាការ:ជំងឺមិនបានធូរស្រាលឡើយ ។
ខ្លួនជាឪពុកក៏បានយកកូនមកតាមរថយន្តតាក់ស៊ីដើម្បីព្យាបាលនៅភ្នំពេញ ដោយមកមានគ្នា4នាក់ គឺមានឪពុក ម្តាយ និងប្រពន្ធទៀត ក្នុងគោលបំណងទៅព្យាបាលនៅមន្ទីរពេទ្យកាល់ម៉ែត ដោយប្រើប្រាស់ប័ណ្ណក្រីក្រ ។
ប្រភពដដែលបានបន្តទៀតថា ដោយសារតែគាត់អត់មានលុយ ហើយមិនសូវស្គាល់ភ្នំពេញផងនោះ មិនដឹងថា ធ្វើម៉េចណានោះទេ គឺមានតែរូបគាត់ជាឪពុកបានបីសពកូនប្រុសដើរទៅររកវត្តនៅជិតនោះ ដើម្បីសុំតម្កល់សពបណ្ដោះអាសន្នសិន ។ ដោយឃើញហេតុការណ៍ដូច្នោះប្រជាពលរដ្ឋដែលបានឃើញហេតុការណ៍ ក៏បានឲ្យកៅអីមានកង់រុញមួយទៅអោយរូបគាត់ជាឪពុក ដើម្បីដាក់សពកូននៅលើកៅអីនោះ ហើយរុញទៅរកវត្តដែលនៅក្បែរកន្លែងកើតហេតុ។
ក្រោយពីមានការភ្ញាក់ផ្អើល និងមានការផ្សាយផ្ទាល់ព័ត៌មានតាមប្រព័ន្ធហ្វេសប៊ុក ក៏មានសប្បុរសធម៌បានឧបត្ថម្ភប្រាក់បន្តិចបន្តួចជូនទៅក្រុមគ្រួសារសព ព្រមទាំងមានតំណាងលោកអភិបាលខណ្ឌទួលគោក ក៏បានមកជួយសម្របសម្រួលបន្ថែមទៀត ដោយបានជួលរថយន្តដឹកសព និងឧបត្ថម្ភថវិកាខ្លះទៅក្រុមគ្រួសារសពដឹកសពទៅស្រុកកំណើតវិញ ដើម្បីធ្វើបុណ្យតាមប្រពៃណី៕ដោយ៖ត្នោត
