តាមរយៈវេទិកាយុវជនជជែកពិភាក្សាពីបរិស្ថានឆ្នាំ២០២០ នៅខេត្តស្ទឹងត្រែង ​នាថ្ងៃទី២៤ ខែសីហានេះ​  លោក ម៉ុម សារឿន អភិបាលខេត្តស្ទឹងត្រែង បានលើកឡើងថា​ ការប្រកួតវគ្គដំបូងនឹងត្រូវធ្វើឡើង ក្រោមប្រធានបទ” ការគ្រងតំបន់ការពារធម្មជាតិ គឺជាកាត​ព្វកិច្ច របស់រដ្ឋបាលថ្នាក់ក្រោមជាតិ” ដែលការប្រកួតប្រជែងនេះគឺបំផុសឱ្យសិស្សានុសិស្ស ចូលរួមយ៉ាងសកម្ម។ 

វេទិកានេះ បានរៀបចំឡើងដោយក្រសួងបរិស្ថាន និងមានកិច្ចសហការពីគម្រោង USIAD ព្រៃឡង់បៃតង ដឹកនាំលោក ផៃ ប៊ុនឈឿន រដ្ឋលេខាធិការប្រចាំការក្រសួងបរិស្ថាន និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តស្ទឹងត្រែង។

លោក ម៉ុម សារឿនបានមានប្រសាសន៍ថា «វេទិកាយុវជនជជែកអំពីបរិស្ថាន ជាឱកាសល្អមួយ ដែលអាចឲ្យសិស្សា​នុសិស្សបញ្ចេញនូវសមត្ថភាពផ្ទាល់ខ្លួនពាក់ព័ន្ធ ទៅនិងការយល់ដឹងអំពីបញ្ហាបរិស្ថានទូទៅ ព្រោះបញ្ហាបរិស្ថានជាបញ្ហារួមដែលយើងគ្រប់គ្នាត្រូវយល់ដឹង»។

វេទិការនេះពិតជាមានអត្ថប្រយោជន៍យ៉ាងខ្លាំង ដោយផ្តល់ឱកាសដល់សិស្សានុសិស្សនៅក្នុងខេត្ត និងអាជ្ញាធរពាក់ព័ន្ធអាចចូលរួមស្តាប់ និងសិក្សាស្វែងយល់ពីបរិស្ថានបន្ថែម ការយល់ដឹងទូទៅអំពីបរិស្ថាន ព្រមទាំងនាំគ្នាចូលរួមការពារ ទប់ស្កាត់ ការបំផ្លាញបរិស្ថាន និងធនធានធម្មជាតិ។

គួរបញ្ជាក់ថា កម្មវិធីនេះ បានលើកទឹកចិត្តឲ្យសិស្សានុសិស្សទាំងអស់ ត្រូវខិតខំយកចិត្តទុកដាក់ចូលរួម ក្នុងវេទិកានេះដែលនឹងផ្តល់សារអប់រំដល់សារធារណជនទូទៅ ឲ្យយល់ដឹងពីអត្ថប្រយោជន៍នៃជីវៈចម្រុះ និងជម្រើសមុខរបរសម្រាប់ប្រជាសហគមន៍ ដើម្បីឈានទៅរកការកែប្រែឥរិយាបថរបស់បុគ្គល និងអភិវឌ្ឍន៍ទង្វើប្រកបដោយសីលធម៌សំដៅចូលរួមយ៉ាងសកម្មក្នុងការការពារ និងអភិរក្សជីវៈចម្រុះឲ្យបានស្ថិតស្ថេរ សម្រាប់ជាប្រយោជន៍ដល់មនុស្សគ្រប់ជំនាន់៕ ដោយ៖ នាង ស្រស់

from： https://tnaot.com/km/m/detail/article/9626072