Sign In 
បើតាមច្បាប់ថ្មី សកម្មភាពសង្កត់កជនល្មើសមិនបានហាមប្រាមនោះឡើយ ប៉ុន្តែត្រូវប្រើប្រាស់ក្នុងស្ថានភាព ដែលកម្លាំងប៉ូលិស អាចប្រឈមនឹងគ្រោះថ្នាក់ដល់ជីវិតតែប៉ុណ្ណោះ។
ប្រធានាធិបតីអាមេរិក ដូណាល់ ត្រាំ កាលពីថ្ងៃទី១៦ ខែមិថុនា បានចុះហត្ថលេខាលើច្បាប់កែទម្រង់កម្លាំងប៉ូលិស ក្នុងពេលបាតុកម្មរាលដាលកាន់តែខ្លាំងនៅអាមេរិក និងប្រទេសជាច្រើន នៅលើពិភពលោក។
មានប្រសាសន៍នៅសេតវិមាន ប្រធានាធិបតី ដូណាល់ ត្រាំ បានលើកឡើងថា «ជនជាតិអាមេរិកចង់បានច្បាប់ និងសណ្តាប់ធ្នាប់។ យើងចាំបាច់ត្រូវតែអនុវត្តច្បាប់ ដើម្បីឲ្យសហគមន៍កាន់តែជិតស្និទ្ធ មិនមែនធ្វើឲ្យឃ្លាតឆ្ងាយពីគ្នានោះឡើយ»។
ច្បាប់ថ្មីនឹងផ្តោតលើការកែទម្រង់ បណ្តុះបណ្តាលកម្លាំងប៉ូលិសឲ្យប្រើប្រាស់បច្ចេកទេស ដើម្បីកាត់បន្ថយភាពតានតឹង។ ជាមួយគ្នានេះ ក៏បានហាមប្រាមប៉ូលិសប្រើប្រាស់កម្លាំងហួសហេតុពេលបំពេញភារកិច្ច។
ក្រុមអ្នកឯកទេសវិភាគបានលើកឡើងថា នេះជាសកម្មភាពថ្មីរបស់ប្រធានាធិបតីអាមេរិក លោក ដូណាល់ ត្រាំ ដើម្បីទាក់ទាញពលរដ្ឋ សម្រាប់ការបោះឆ្នោត នៅថ្ងៃទី៣ ខែវិច្ឆិកា។ ការស្ទង់មតិកន្លងមក លោក ត្រាំ បាត់បង់ការគាំទ្រជាច្រើន៕ ប្រែសម្រួលដោយ៖ MEO
