Sign In 
ការគ្រប់គ្រងលុយកាន់តែមានសារៈសំខាន់ និងកាន់តែស្មុគស្មាញផងដែរតាំងពីការផ្ទុះជំងឺកូវីដ ១៩ នៅដើមឆ្នាំ ២០២០ នេះមក ។ ពេលបច្ចុប្បន្ននេះអាចជាពេលល្អក្នុងការរួមដៃគ្នាដើម្បីដើរឆ្ពោះទៅរកគោលដៅផ្សេងៗក្នុងជីវិតរបស់អ្នក ។ ប៉ុន្តែវាមិនងាយស្រួលទេក្នុងការធ្វើដូច្នេះប្រសិនបើអ្នកមិនពិភាក្សាជាមួយដៃគូរបស់អ្នកឲ្យបានច្បាស់លាស់ជាមុន ។
អ្វីមួយដែលអ្នកត្រូវតែទទួលស្គាល់មុនគេបង្អស់គឺ ក្នុងគ្រប់ទំនាក់ទំនងទាំងអស់តែងតែមានមនុស្សម្នាក់ដែលចាយច្រើនជាងមនុស្សម្នាក់ទៀត ។ វាមិនមែនជាការបរាជ័យគឺបញ្ហាមួយទេ ព្រោះវាជារឿងធម្មតារវាងមនុស្សនិងមនុស្ស ។ប្រសិនបើអ្នកមានដៃគូក្នុងជីវិត ឬគូស្នេហ៍ដែលច្បាស់លាស់ អ្នកអាចពិចារណានូវវិធីសាស្ត្រខាងក្រោមនេះដើម្បីពង្រឹងការសហការគ្នារវាងអ្នកទាំងពីរក្នុងការគ្រប់គ្រងលុយរួម ៖
១. រៀបចំពេលនិយាយពីរឿងលុយ
មុនអ្វីៗទាំងអស់ អ្នកត្រូវតែពិភាក្សាជាមួយដៃគូរបស់អ្នកឲ្យបានច្បាស់លាស់ពីគោលដៅ និងទម្លាប់ក្នុងការចាយវាយ ឬសន្សំលុយរបស់ភាគីទាំងអស់ឲ្យបានក្បោះក្បាយជាមុនសិន ។ ប្រសិនបើអ្នកមានបំណុលជាប់ខ្លួន នោះអ្នកក៏គួរតែរក្សាភាពស្មោះត្រង់ជាមួយភាគីម្ខាងទៀតដែរ ។
២. រៀបចំផែនការចាយវាយ
តួលេខមិនអាចកុហកបានទេដូច្នេះអ្នកអាចប្រើវាដើម្បីយល់ដឹងបន្ថែមពីទម្លាប់ចាយវាយលុយរបស់ដៃគូរបស់អ្នកបាន ព្រមទាំងបង្កើតនូវផែនការចាយវាយមួយជាក់លាក់សម្រាប់ថ្ងៃអនាគត ។ អ្នកអាចកំណត់ការចាយវាយប្រចាំខែទុកជាមុន ដើម្បីតាមដានទម្លាប់ចាយវាយនិងសន្សំលុយ ។ វានឹងជួយឲ្យអ្នកមើលឃើញពីភាពខុសគ្នារវាងទម្លាប់របស់អ្នក និងទម្លាប់ដៃគូអ្នក ។
៣. ព្យាយាមយល់ពីភាគីម្ខាងទៀត
ប្រសិនបើអ្នកមិនអាចនិយាយត្រូវគ្នាជាមួយដៃគូរបស់អ្នកទេ អ្នកមិនគួរចុះចាញ់ឡើយ ។ អ្នកអាចព្យាយាមយល់បន្ថែមពីដៃគូ និងត្រលប់មកនិយាយគ្នាម្តងទៀតពេលដែលអ្នកទាំងពីរត្រៀមខ្លួនរួចរាល់ ។ នៅពេលដែលអ្នកមិនយល់ស្របទៅនឹងទម្លាប់ចាយវាយ ឬទម្លាប់សន្សំលុយរបស់ដៃគូរបស់អ្នក អ្នកគួរតែនិយាយគ្នាតាមសម្រួល ។ ប្រសិនបើដៃគូអ្នកមានអារម្មណ៍ថាអ្នកចង់ប្រកែកឬស្តីឲ្យនោះ គេអាចនឹងព្យាយាមលាក់បាំង ឬគេចវេសការសន្ទនាសំខាន់នេះទាំងស្រុង ។
អ្នកត្រូវចងចំថាលុយមិនគួរជាអ្វីដែលធ្វើឲ្យអ្នកទាំងពីរកាន់តែឃ្លាតឆ្ងាយពីគ្នាឡើយ ។ ផ្ទុយមកវិញ វាគួរតែជាអ្វីដែលធ្វើឲ្យអ្នកទាំងពីរកាន់តែជិតស្និទ្ធគ្នា និងអនុញ្ញាតឲ្យអ្នកយល់ដឹងពីដៃគូបានល្អជាងមុន ៕ ផ្ដល់សិទ្ធដោយ៖ កោះសន្តិភាព
