(ភ្នំពេញ)៖ រហូតដល់ម៉ោង ៨:៣០ព្រឹក ថ្ងៃទី១៦ ខែមិថុនា ឆ្នាំ២០២០ នេះ ពុំរកឃើញករណីថ្មីនៃជំងឺកូវីដ១៩ (Covid-19) ឡើយ ខណៈអ្នកជាសះស្បើយមាន ១២៥នាក់ និងអ្នកជំងឺកំពុងសម្រាកព្យាបាល មានចំនួន ៣នាក់ នៅរាជធានីភ្នំពេញ។

គិតមកដល់ពេលនេះ នាយកដ្ឋានប្រយុទ្ធនឹងជំងឺឆ្លង បានបង្ហាញថា បានធ្វើតេស្តចំនួន ២៧៥៩៩ ស្មើនឹង ១៦៦២ ក្នុង ១លាននាក់។

តាមការលើកឡើងរបស់នាយកដ្ឋានប្រយុទ្ធនឹងជំងឺឆ្លង (CDC) បានឱ្យដឹងថា ជំងឺកូវីដ១៩ នៅតែបន្តគម្រាមកំហែងយើងជាប់ជានិច្ច សូមបងប្អូនបន្តប្រយ័ត្នជាប់ជានិច្ច ដោយធ្វើអនាម័យ នៅឃ្លាតឆ្ងាយពីគ្នា មិនចេញក្រៅផ្ទះបើមិនចាំបាច់ ព្រោះប្រទេសជិតខាងយើង និងពិភពលោកកំពុងបន្តរាតត្បាត ដ៏ខ្លាំងក្លានៅឡើយ។

ករណីនេះ រដ្ឋាភិបាល នៅតែបន្តអនុវត្តគម្លាតសង្គមបន្តទៀត ដូចជាពន្យាការរៀបអាពាហ៌ពិពាហ៌ ពិធីជប់លៀង ការចាក់ធុងបាសរាំ ។ ល។ និងត្រូវបន្តគម្លាតបុគ្គលបន្តទៀត ដូចជាអង្គុយគម្លាតពីគ្នា ឈររងចាំគម្លាតពីគ្នា និងឈរជជែកគ្នាគម្លាតពីគ្នាជាដើម។

សូមជម្រាបថា ប្រទេសកម្ពុជា បានរកឃើញករណីជំងឺកូវីដ១៩ ដំបូងបំផុតនៅថ្ងៃទី ២៧ ខែមករា ឆ្នាំ២០២០ រហូតមកដល់បច្ចុប្បន្ននេះ មានអ្នកឆ្លងសរុប ១២៨នាក់ មានស្រ្តីចំនួន ៣៩នាក់ និងបុរស ៨៩នាក់ (គិតទាំងរលកទី១ និងរលកទី២ នៃករណីឆ្លងវីរុសកូវីដ១៩ នៅកម្ពុជា) ។ ក្នុងនោះ កម្ពុជាបានព្យាបាលជាសះស្បើយទាំងស្រុងបានចំនួន ១២៥នាក់ ដែលមានស្រី ៣៩នាក់ និងប្រុស ៨៦នាក់ ស្មើនឹង ៩៧,៦៥%៕

from： https://tnaot.com/km/m/detail/article/9388519