Sign In 
អង្គការសុខភាពពិភពលោក ឬ WHO កាលពីថ្ងៃទី១៥ ខែមិថុនា ឆ្នាំ២០២០ បានប្រកាសថា ជាង១០០ករណី ស្តីអំពីវីរុសកូរ៉ូណាប្រភេទថ្មីត្រូវបានកត់ត្រាផ្លូវការនៅទីក្រុងប៉េកាំង ។ 
ខណៈដែលការរឹតត្បិត មានការបន្ធូរបន្ថយនៅប្រទេសជាច្រើន ក្នុងតំបន់អឺរ៉ុប ក៏ដូចជាការបើកទ្វារព្រំដែនរបស់ពួកគេឡើងវិញនោះ អង្គការសុខភាពពិភពលោកបានព្រមានដល់ប្រទេសទាំងនោះឲ្យរក្សាការប្រុងប្រយ័ត្នចំពោះលទ្ធភាពវិលត្រឡប់មកវិញ នូវការឆ្លងវីរុសកូវីដ១៩នេះ ។ 
ភ្នាក់ងារសុខភាពអង្គការសហប្រជាជាតិបានបញ្ជាក់ថា បើទោះបីថា មិនមានករណីស្លាប់ថ្មីនៅក្នុងរដ្ឋធានីនៃប្រទេសចិនក៏ពិតមែន ប៉ុន្តែទំហំនៃការតភ្ជាប់ពីទីក្រុងប៉េកាំង បន្ទាប់ពីការផ្ទុះឡើងនៃជំងឺនេះ គឺជាមូលហេតុដែលគួរឲ្យព្រួយបារម្ភបំផុត ។ 
លោក Tedros Adhanom Ghebreyesus នាយកអង្គការ WHO បានថ្លែងក្នុងសន្និសីទកាសែតពិសេសមួយថា «បើទោះបីនៅក្នុងប្រទេសជាច្រើនបានគ្រប់គ្រងទៅលើការចម្លងវីរុសនេះក៏ពិតមែន ប៉ុន្តែប្រទេសជាច្រើននោះត្រូវរក្សាការប្រុងប្រយ័ត្នចំពោះការផ្ទុះឡើងជាថ្មីនៃវីរុសនេះ ។ កាលពីសប្តាហ៍មុន ចិនបានកត់ត្រាចង្កោមថ្មីមួយនៅក្នុងទីក្រុងប៉េកាំង បន្ទាប់ពីជាង៥០ថ្ងៃគ្មានសូម្បីមួយករណីឆ្លងនៅទីក្រុងនេះ ។ ប៉ុន្តែឥឡូវនេះជាង១០០ករណីត្រូវបានកត់ត្រា ។ ប្រភពដើម និងទំហំនៃការចម្លងនេះបាននិងកំពុងស្ថិតក្រោមស៊ើបអង្កេត» ។
គួរបញ្ជាក់ថា គិតត្រឹមថ្ងៃទី១៦ ខែមិថុនា ជំងឺកូវីដ១៩នៅជុំវិញពិភពលោកបានឆ្លងលើមនុស្សជាង ៨,១ លាននាក់ ក្នុងនោះបាត់បង់ជីវិត ៤៣៩ ០៥១ នាក់ ។ ប៉ុន្តែជាង៤,២លាននាក់បានជាសះស្បើយវិញផងដែរ ៕ ប្រែសម្រួលដោយ៖ thach yat
