បើតាមគេហទំព័ររបស់ទស្សនាវដ្ដី Forbes បានផ្សាយថា នៅឆ្នាំ២០២០នេះ លោក Jeff Bezos ក្លាយជាមហសេដ្ឋីកំពូល លំដាប់លេខ១របស់ពិភពលោក ដោយមានទ្រព្យសម្បត្ដិ រហូតដល់ជាង១១៣ពាន់លានដុល្លារអាមេរិក។

លោក Jeff Bezos ​កើត នៅថ្ងៃទី១២ ខែមករា ឆ្នាំ១៩៦៤ ហើយនៅឆ្នាំ២០២០នេះ លោកមហាសេដ្ឋី មានអាយុ៥៦ឆ្នាំ និងរស់នៅសហរដ្ឋអាមេរិក។ លោកមានភាពល្បីល្បាញ ក្រោយការបង្កើតក្រុមហ៊ុនពាណិជ្ជកម្មតាមបណ្ដាញអេឡិចត្រូនិក (E-Commerce) មួយ ឈ្មោះ Amazon នាឆ្នាំ១៩៩៤ នៅខាងក្រៅយានដ្ឋានរបស់គាត់ នៅទីក្រុងកំពង់ផែសមុទ្រ នាភាគខាងលិចសហរដ្ឋអាមេរិក គឺទីក្រុង Seattle ។ មុនដំបូង គាត់បានបង្កើតក្រុមហ៊ុននេះ ក្នុងនាមជានាយកប្រតិបត្ដិ និងមានភាគហ៊ុន ចំនួន ១១,១ភាគរយ។  

លោក Jeff Bezos ជាសហគ្រិនអ៊ិនធើរណេត ជាឧស្សាហករ ជាម្ចាស់បណ្ដាញផ្សព្វផ្សាយ និងជាវិនិយោគិន ជនជាតិអាមេរិកាំង។ លោក Jeff Bezos បានក្លាយជាមនុស្សល្បីល្បាញបំផុត ក្រោយក្លាយជាស្ថាបនិក ជានាយកប្រតិបត្ដិ (CEO) និងជាប្រធានក្រុមហ៊ុនបច្ចេកវិទ្យាពហុជាតិសាសន៍ ឈ្មោះ Amazon ។ រហូតមកដល់ពេលនេះ លោក Jeff Bezos មានទ្រព្យសម្បត្ដិផ្ទាល់ខ្លួន រហូតដល់១១៣ពាន់លានដុល្លារអាមេរិក ធ្វើឲ្យលោកក្លាយជាមហាសេដ្ឋីលេខ១ នៅលើពិភពលោក នាឆ្នាំ២០២០នេះ។

យោងតាមអត្ថបទមហាសេដ្ឋីមានទ្រព្យរយពាន់លាន់ដុល្លារជាលើកដំបូងរបស់ Forbes បានឲ្យដឹងថា លោក Bezos បានក្លាយជាមហាសេដ្ឋី​ មានទ្រព្យច្រើនជាងគេបំផុត នៅលើពិភពលោក ចាប់តាំងពីឆ្នាំ២០១៧មកម៉្លេះ។ គាត់បានក្លាយជាកំពូលអ្នកមានបំផុត ក្នុងប្រវត្ដិសាស្រ្ដា នាសម័យទំនើប បន្ទាប់ពីបណ្ដាញទ្រព្យសម្បត្ដិរបស់គាត់ បានកើនឡើង ដល់១៥០ពាន់លានដុល្លារអាមេរិក នៅក្នុងអំឡុងខែកក្កដា ឆ្នាំ២០១៨។ លុះមកដល់អំឡុងខែសីហា ឆ្នាំ២០១៨ Forbes បានសរសេររៀបរាប់អំពីលោកមហាសេដ្ឋី ដែលក្លាយជាអ្នកមានបំផុតដាច់ជាងគេ នៅលើភពផែនដីនេះ ដោយសារលោកបានបន្ថែមប្រាក់ ១,៨ពាន់លានដុល្លារអាមេរិកទៅលើបណ្ដាញទ្រព្យសម្បត្ដិរបស់គាត់ ខណ:ក្រុមហ៊ុន Amazon​ ក្លាយជាក្រុមហ៊ុនលំដាប់ទី២ នៅក្នុងប្រវត្ដិសាស្រ្ដ មានទឹកប្រាក់នៅលើទីផ្សារ រហូតដល់១ពាន់កោដិលានដុល្លារអាមេរិក ($1 trillion) ។

លោក Jeff Bezos បានកើត នៅក្នុងតំបន់ Albuquerque ហើយបានរើទៅនៅទីក្រុង ហូស្ដុន និងក្រោយមក រស់ក្នុងទីក្រុង Miami ។ លោក Bezos បានបញ្ចប់ការសិក្សា នៅក្នុងសាកលវិទ្យាល័យ Princeton នៅក្នុងអំឡុងឆ្នាំ១៩៨៦ ដោយទទួលបានសញ្ញាបត្រផ្នែកវិស្វកម្មអេឡិចត្រូនិក និងវិទ្យាសាស្រ្ដកុំព្យូទ័រ។ ក្រោយមក លោកបានទៅបម្រើការងារ នៅក្នុងក្រុមហ៊ុនភាគហ៊ុន Wall Street នៅក្នុងផ្នែកពាក់ព័ន្ធជាច្រើន ចន្លោះពីឆ្នាំ១៩៨៦ ដល់ដើមឆ្នាំ១៩៩៤។

រហូតមកដល់ចុងឆ្នាំ១៩៩៤ លោក Bezos បានបង្កើនក្រុមហ៊ុន Amazon នៅតាមផ្លូវពីទីក្រុងញូវយ៉កទៅកាន់ទីក្រុង Seattle ។ ក្រុមហ៊ុននេះ​បានចាប់ផ្ដើមបង្កើតការលក់ដូរ នៅតាមអនឡាញ ហើយចាប់តាំងពីពេលនោះមក ក៏ពង្រីកការលក់ដូរផលិតផល និងសេវាកម្មផ្សេងៗទៀត តាមបែបពាណិជ្ជកម្មអេឡិចត្រូវនិក។ បច្ចុប្បន្ន Amazon បានក្លាយជាក្រុមហ៊ុនដ៏ធំបំផុត នៅលើពិភពលោក ទាំងការលក់តាមអនឡាញដ៏ធំបំផុត, រកចំណូលបានច្រើនបំផុតតាមបណ្ដាញអ៊ីនធើរណេត និងជាក្រុមហ៊ុនផ្ដល់ជំនួយ ហើយសេវាកម្មហេដ្ឋារចនាសម្ព័ន្ធតាមបណ្ដាញសាខារបស់ Amazon ។

បើទោះជាបច្ចុប្បន្ន នៅលើពិភពលោក រងការរាតត្បាតពីកូវីដ១៩ ហើយប្រទេសជាច្រើនត្រូវបិទ ដើម្បីទប់ស្កាត់វីរុសដ៏កាចសាហាវនេះក្ដី តែក្រុមហ៊ុន Amazon នៅតែមានលទ្ធភាពអាចរកប្រាក់ចំណូលកើនឡើងយ៉ាងច្រើន។ ដោយសារតែកំណើនប្រាក់ចំណូលបែបនេះ ទើបក្រុមហ៊ុន​ មានលទ្ធភាពជួលបុគ្គលិក រហូតដល់១៧៥ ០០០នាក់បន្ថែមទៀត។ ស្ថិតក្នុងអំឡុងពេលមានវិបត្ដិកូវីដ១៩នេះ លោក Jeff Bezos នាយកប្រតិបត្ដិអាម៉ាហ្សូន (CEO of Amazon) នៅតែមានឱកាសបង្កើនទ្រព្យសម្បត្ដិ បន្ថែម រហូតដល់ ៣៦,២ពាន់លានដុល្លារអាមេរិក លើទ្រព្យសម្បត្ដិរបស់គាត់ដែលមានស្រាប់ថែមទៀតផង៕ ប្រែសម្រួលដោយ Nuon

from： https://tnaot.com/km/m/detail/article/9385412