កីឡាករ Pedro Chirivella ខ្សែបម្រើកណ្តាលរបស់ក្លិប Liverpool ត្រូវបានគេរាយការណ៍ថា បានយល់ព្រមផ្លាស់ទៅលេងនៅក្លិប Nantes ក្នុងកិច្ចសន្យារយៈពេលបីឆ្នាំ។

ខ្សែបម្រើសញ្ជាតិអេស្ប៉ាញរូបនេះ បានផ្លាស់ចេញពីក្លិប Valencia មកកាន់ក្លិបដែលមានរហស្សនាមថា ហង្សក្រហម នៅឆ្នាំ២០១៥។ ការផ្លាស់មកទីនេះ រូបគេបានលេងនៅក្នុងក្រុមថ្នាលយុវជនរបស់ក្លិបរយៈពេលពីរឆ្នាំ។ ក្រោយមកក្លិបបានដាក់រូបគេឱ្យទៅក្លិប Go Ahead Eagles ដើម្បីខ្ចីជើងរយៈពេលមួយរដូវកាលសិន។ មួយឆ្នាំក្រោយមក រូបគេត្រូវបានក្លិប Willem II ខ្ចីជើងមួយរដូវកាលផងដែរ។ មួយឆ្នាំក្រោយមកទៀត គេត្រូវបានឱ្យក្លិប Loan to Extremadura ខ្ចីជើងមួយរដូវកាល​។ សរុបមករយៈពេលបីឆ្នាំ រូបគេត្រូវបានក្លិប Liverpool ដាក់ឱ្យក្លិបដទៃខ្ចីជើងរហូត។

លុះមកដល់រដូវកាលឆ្នាំនេះ រូបគេបានវិលមកកាន់ក្លិបដែលជាអាណាព្យាបាលវិញ ក៏ប៉ុន្តែពុំសូវមានឱកាសចូលលេងក្រោមអ្នកចាត់ការទូទៅលោក Klopp នោះទេ។

ដូច្នេះ កីឡាករ Chirivella មានវ័យ២៣ឆ្នាំ នឹងត្រូវផ្លាស់ទៅក្លិប Nantes នៅឯប្រទេសបារាំង ដើម្បីមានឱកាសបានចូលលេងជាប់លាប់ជាងពេលដែលនៅទ្រនំចាស់។ កិច្ចសន្យាជាមួយក្លិបនៅបារាំងលើកនេះ នឹងមានសុពលភាពរហូតដល់ឆ្នាំ២០២៣ ហើយវាជារយៈពេលដែលរូបគេអាច​អភិវឌ្ឍន៍សមត្ថភាពខ្លួនឯងបានល្អជាងមុន​ក៏អាចថាបាន។

កែសម្រួលដោយ៖ ភារ៉ា

ប្រភព៖ livescore

from： https://tnaot.com/km/m/detail/article/9373334