Sign In 
អត្រាសិស្សប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០១៩-២០២០ អាចនឹងមានកំណើនធ្លាក់ច្រើនលើសលុប ប្រសិនបើក្រសួងអប់រំយុវជននិងកីឡា នៅតែអនុវត្តគោលការ អ្នកចេះគឺជាប់ ដោយកំណត់យកពិន្ទុខ្ពស់ តាមនិទ្ទេសពី A-F ដូចជាការប្រឡង ដែលកើតមានកាលឆ្នាំមុនៗ។
បណ្តាគ្រឹះស្ថានអប់រំឯកជននានា នៅប្រទេសកម្ពុជា បានស្នើឱ្យក្រសួងអប់រំយុវជន និងកីឡា ត្រូវពិនិត្យពិចារណាឡើងវិញ ទៅលើគោលការប្រឡង សម្រាប់ឆ្នាំសិក្សា២០១៩-២០២០ ដោយមិនគួរកំណត់ឱ្យមានការដាក់ពិន្ទុខ្ពស់ និងការដាក់និទ្ទេស ឱ្យដូចឆ្នាំមុនៗនោះឡើយ។
បើតាមលោកប៉ិច បូឡែន អគ្គនាយក Westline Education Group បានឱ្យដឹងថា ពីមុនគោលការរបស់ក្រសួងអាចអនុញ្ញាត ឱ្យគ្រឹះស្ថានសិក្សាឯកជន ធ្វើការប្រឡងតាមប្រព័ន្ធអនឡាញ ប៉ុន្តែឥឡូវនេះលោកនៅរង់ចាំដំណឹងថ្មីបន្តទៀត ពីខាងក្រសួង។
លោកប៉ូឡែនមានប្រសាសន៍ថា កន្លងមកនេះក្រសួងអប់រំ ធ្លាប់បានព្រលយពាក្យថា លទ្ធផលនៃការប្រឡងឆ្នាំនេះ វាមិនដូចរាល់ឆ្នាំនោះទេ វាជាសម័យប្រឡងកូវីដ ដូច្នេះវាគឺជាលទ្ធផលរបស់គ្រូ ហើយក្រសួង គួរទទួលយកនូវលទ្ធផលនេះដូចគ្នា។
លោកថា” អត់មានអាចជាកត្តារាំងស្ទះអ្វីទេ សូម្បីតែនិទ្ទេស ព្រោះកន្លងមកនេះ រដ្ឋមន្ត្រីបានលើកឡើងថា ការប្រឡងឆ្នាំនេះ គឺមិនមាននិទ្ទេសទេ”។
លោកវេជ្ជបណ្ឌិត គួច ម៉េងលី ស្ថាបនិកនៃវិទ្យាស្ថាន និងជានាយកសាលាអន្តរទ្វីបអាមេរិកាំង បានឱ្យដឹងថា ចំពោះការប្រឡងមធ្យមសិក្សាឆ្នាំនេះ ប្រសិនបើដាក់និទ្ទេសកំនត់ពិន្ទុប្រឡងដូចឆ្នាំមុនៗ គឺមិនយុត្តិធ៌ម សម្រាប់សិស្ស ព្រោះសិស្សទាំងនៅខេត្ត និងជនបទ មិនសូវបានទទួលការសិក្សាពេញលេញ ។
លោកបញ្ជាក់ថា “អំឡុងពេលកើតមានវិបត្តិកូវីដ១៩ ប្រទេសជិតខាង បានរុញឱ្យសិស្សជាប់ទាំងអស់ គឺមិនមានអ្នកណាធ្លាក់ឡើយ។ ប៉ុន្តែបើសិនជាក្រសួងមានគោលការកំណត់យកនិទ្ទេសដូចឆ្នាំមុនៗ គឺអត្រាសិស្សនៅប្រទេសកម្ពុជា និងមានការធ្លាក់ច្រើនលើសលុប”។
លោកបន្តថា សម្រាប់សិស្សឆ្នាំនេះ គឺមិនបានត្រៀមខ្លួន មិនបានទៅរៀនគួរ ហើយសិស្សបានបាក់ទឹកចិត្ត នឹងនៅវិលវក់ មិនបានគិតពីការសិក្សាប៉ុន្មាននោះទេ ពួកគេបានគិតតែម្យ៉ាងគត់ គឺបញ្ហាសុខភាព។
បើតាមអ្នកជំនាញផ្នែកអប់រំវិស័យឯកជន ខាងលើនេះបានឱ្យដឹងថា ក្រោយវិបត្តិកូវីដ ក្រសួងបានចាត់វិធានការបិទសាលារៀន ហើយបង្វែរកម្មវិធីអប់រំសិស្សដោយបង្រៀនតាមប្រព័ន្ធអនឡាញវិញ។
ការបង្រៀនតាមប្រព័ន្ធអនឡាញ វាមិនបានបំពេញ ទៅលើការសិក្សារបស់សិស្ស ឱ្យគ្រប់គ្រាន់នោះឡើយ ហើយអ្នករស់នៅតាមជនបទ គឺខ្វះឧបករណ៍ និងសម្ភារៈរៀនផងដែរ ពិសេសគឺបញ្ហាអ៊ីនធើណេតតែម្តង។
ទាក់ទងទៅនឹងសំណួរដែលបានលើកឡើងថា គ្រឹះស្ថានអប់រំឯកជន មានការគាំទ្រទៅលើការប្រឡងមិនឱ្យមានការកំណត់យកនិទ្ទេស សម្រាប់ឆ្នាំនេះ។ ជាមួយគ្នាផងដែរ អ្នកនាំពាក្យក្រសួងអប់រំយុវជននិងកីឡា លោករស់ សុវាចា បានប្រាប់ឱ្យដឹងដែរថា នោះគឺជាទស្សនៈ របស់ក្រុមការងារវិស័យឯកជន។ លោកបញ្ជាក់ថា ពាក់ព័ន្ធព័ត៌មាននៃការប្រឡងឆ្នាំនេះ ក្រសួងនឹងជម្រាបជូនព័ត៌មានជាបន្តបន្ទាប់ទៀត។
សូមបញ្ជាក់ថា ឈរក្នុងស្មារតីចូលរួមបង្ការ និងទប់ស្កាត់ការរីករាលដាលជំងឺកូវីដ១៩ ក្រសួងអប់រំ យុវជន និងកីឡា បានធ្វើការពន្យារពេលកាលបរិច្ឆេទ នៃសម័យប្រឡងសញ្ញាបត្រមធ្យមសិក្សាបឋមភូមិ និងទុតិយភូមិ។ ហើយក្រសួងគ្រោងនឹងជម្រាបជូនដំណឹងនៃកាលបរិច្ឆេទ នៃសម័យប្រឡង នៅពេលក្រោយ៕ ដោយ៖ ឃួន លក្ខិណា
