Sign In 
ឥណ្ឌាមានអ្នកជំងឺឆ្លងកូវីដ១៩កើនឡើងសរុប ២៩៧ ៥៣៥ នាក់ លើសពីចក្រភពអង់គ្លេសដែលជាប្រទេសឆ្លងបំផុតទី៤ក្នុងពិភពលោក ។
ក្រសួងសុខាភិបាល និងសុខុមាលភាពគ្រួសាររបស់ឥណ្ឌា បានប្រកាសនៅថ្ងៃទី១២ ខែមិថុនា ឆ្នាំ២០២០ថា ក្នុងរយៈពេលមួយថ្ងៃ ឥណ្ឌាមានករណីឆ្លងថ្មីកូវីដ១៩សរុប ១០ ៩៥៦ នាក់ ។ អ្នកជំងឺបាត់បង់ជីវិតថ្មីសរុប ៣៩៦នាក់ ធ្វើឲ្យកើនឡើងសរុប ៨ ៤៩៨ នាក់ ។
ពេលនេះឥណ្ឌាក្លាយជាប្រទេសទី៤ឆ្លងកូវីដ១៩ច្រើនជាងគេបំផុតបន្ទាប់ពីសហរដ្ឋអាមេរិក, ប្រេស៊ីល និងរុស្ស៊ី ។
ឥណ្ឌាបាននិងកំពុងបិទ ឬចាក់សោប្រទេសរយៈពេល២ខែកន្លងមកនេះ ដើម្បីទប់ស្កាត់ការឆ្លងរាតត្បាតពីវីរុសកូវីដ១៩ នៅក្នុងប្រទេសដែលមានពលរដ្ឋជាង១,៣ ពាន់លាននាក់នេះ ។ ប៉ុន្តែយ៉ាងណាក៏ដោយ មន្ត្រីសុខាភិបាលបានបញ្ជាក់ថា ប្រហែលត្រូវចំណាយពេលច្រើនខែទៀត ការចាក់សោ ឬបិទប្រទេសនេះដើម្បីទប់ស្កាត់កូវីដ១៩ ។
ការចាក់សោប្រទេសនៅឥណ្ឌាចាប់ផ្តើមតាំងពីចុងខែមីនា នៅទូទាំងប្រទេស ។ ប៉ុន្តែចំណុចខ្លះបានបន្ធូរបន្ថយផងដែរ ។ តំបន់ខ្លះនៅពេលបច្ចុប្បន្ននេះ កំពុងប្រឈមការឆ្លងរាតត្បាតខ្លាំងពីវីរុស ។ ពលរដ្ឋក្នុងប្រទេសនេះបានប្រមូលផ្តុំគ្នាយ៉ាងឆាប់រហ័ស ក្រោយពីអនុញ្ញាតឲ្យបើកហាងលក់ទំនិញ, ផ្សារទំនើប, ទីតាំងផលិតកម្ម និងកន្លែងជួបជុំសាសនា ។
ផ្លូវក្រោមដី, សាលារៀន, សាកលវិទ្យាល័យ និងរោងភាពយន្ត ទោះយ៉ាងណា នៅតែបិទទូទាំងប្រទេសដដែល ។
ទីក្រុងម៉ុមប៉ៃ, ញូវដេលី និងឆេនណាយ ជាទីក្រុងរាតត្បាតពីវីរុសខ្លាំងជាងគេបំផុតនៅក្នុងប្រទេសនេះ ។ ប្រជាជនរស់នៅតាមទីជនបទ ក៏ប្រឈមមុខនឹងឱកាសឆ្លងកូវីដ១៩ខ្ពស់បំផុតផងដែរ ។ ការឆ្លងនៅតាមទីជនបទកើនឡើងនៅពេលដែលកម្មករចំណាកស្រុកបានចាកចេញពីតំបន់ប្រជុំជន និងទីក្រុងនានា បន្ទាប់ពីបាត់បង់ការងារ ត្រឡប់ទៅកាន់ស្រុកកមណើតរបស់ពួកគេ ៕ ប្រែសម្រួលដោយ៖ thach yat
