ថៃនឹងបង្កើត​នាយកដ្ឋានប៉ូលិស​ពិសេស ​ប្រឆាំងនឹងបទល្មើសបច្ចេកវិទ្យា ដោយមានកម្លាំង​ប៉ូលិសជំនាញ សរុបជាង១៧០០នាក់ គ្រប់គ្រងលើបណ្តាញបច្ចេកវិទ្យា​ ហើយដាក់ពង្រាយទូទាំងប្រទេស ដើម្បីដោះស្រាយ​បញ្ហាពាក់ព័ន្ធនឹងការបំពានច្បាប់​បច្ចេកវិទ្យាជាន់ខ្ពស់ ។

សារព័ត៌មាន​ Bangkok Post នៅថ្ងៃទី​១២ ខែមិថុនា បានផ្សាយថា គម្រោងបង្កើតខាងលើត្រូវបានអគ្គមេបញ្ជាការកម្លាំងប៉ូលិសជាតិ លោក Chakthip Chaijinda បានអនុម័ត កាលពីថ្ងៃទី​២៨ ខែឧសភា មកម៉្លេះ ក្នុងការបង្កើតនាយកដ្ឋានប្រឆាំងបទល្មើសបច្ចេកវិទ្យា។

នៅក្នុងកិច្ចប្រជុំគណៈកម្មការប៉ូលិសជាតិ ដឹកនាំដោយនាយករដ្ឋមន្ត្រី ប្រាយុទ្ធ ចាន់អូចា ក៏បានលើកឡើងពីការបង្កើតកម្លាំងប៉ូលិសពិសេសនេះផងដែរ ក្នុងពេលបច្ចេកវិទ្យាកំពុងតែពេញនិយមប្រើប្រាស់ នៅលើពិភពលោក​។

ទន្ទឹមនឹងនេះ លោក Buddhipongse Punnakanta រដ្ឋមន្រ្តីក្រសួងសេដ្ឋកិច្ចឌីជីថល និងសង្គមបានមានប្រសាសន៍ថា នាយកដ្ឋានប៉ូលិសបណ្តាញ ​​នឹងជាផ្នែកមួយ នៃឧក្រិដ្ឋកម្មបច្ចេកវិទ្យា។

តាមគម្រោង នាយកដ្ឋានប៉ូលិសខាងលើនឹងបង្កើតឡើងក្នុងអំឡុងពេល​៣ខែខាងមុខ ដោយមាន៧អង្គភាព​ មានសមាជិក ១៧០៥នាក់​៕ ប្រែសម្រួលដោយ៖ MEO

from： https://tnaot.com/km/m/detail/article/9369527