(ម៉ិកស៊ិក)៖ កីឡាករខ្សែប្រយុទ្ធសញ្ជាតិអាហ្សន់ទីន Rogelio Funes Mori លេងឲ្យក្លឹប Monterrey ស្ថិតក្នុងប្រទេសម៉ិកស៊ិក បានប្រាប់ឲ្យដឹង នៅថ្ងៃពុធថា លោកទទួលបានលទ្ធផលវិជ្ជមាន នៃជំងឺ COVID-19។

កីឡាករជនជាតិអាហ្សន់ទីន វ័យ២៩ឆ្នាំរូបនេះ មិនមានរោគសញ្ញាលើរូបរាងកាយនោះទេ ប៉ុន្តែលោកថា លោកបានរស់នៅដាច់ដោយឡែកពីគេ មួយអំឡុងពេលហើយ ដើម្បីការពារក្រុមគ្រួសារ និងមិត្តរួមក្រុមរបស់លោក។

លោក Funes Mori បានប្រាប់ឲ្យដឹងនៅលើបណ្តាញទំនាក់ទំនង Instagram ថា «ខ្ញុំចង់ប្រាប់ទៅអ្នកទាំងអស់គ្នាថា ខ្ញុំមានជំងឺ COVID-19 ចំណែកអ្នកគ្រប់គ្នា នៅក្នុងគ្រួសាររបស់ខ្ញុំ មានលទ្ធផលអវិជ្ជមាន តែខ្ញុំមានសុខភាពល្អធម្មតា ហើយខ្ញុំសម្រេចថា ចែកចាយព័ត៌មាននេះ ដើម្បីជួយលើកកម្ពស់ការយល់ដឹង ឥឡូវនេះ វាជាពេលវេលា ដើម្បីជាសះស្បើយ ដូច្នេះខ្ញុំអាចហ្វឹកហាត់ម្តងទៀតបាន ខ្ញុំនឹងត្រឡប់មកវិញ ក្នុងរយៈពេល១០ថ្ងៃក្រោយ»។

គួរបញ្ជាក់ថា Funes Mori បានសុតបញ្ចូលទី៩៥គ្រាប់ ក្នុង១៨៦ប្រកួត ឲ្យក្លឹប Monterrey ចាប់តាំងពីចូលរួមក្នុងក្លឹបនេះ នៅក្នុងឆ្នាំ២០១៥។ លោក ធ្លាប់បានជាប់ជា កីឡាករជម្រើជាតិម្តងផងដែរ នៃក្រុមបាល់ទាត់អាហ្សន់ទីន៕

ប្រែសម្រួលដោយ៖ ពិសិទ្ធី 

ប្រភព៖ Xinhua

from： https://tnaot.com/km/m/detail/article/9367222