កាលពីថ្ងៃចន្ទអតីតបវរកញ្ញាថៃអ្នកស្រី Panadda Wongphudee បានដាក់ពាក្យបណ្តឹងទៅប៉ូលិសដោយចោទប្រកាន់បុរស​អាយុ ៤២ឆ្នាំម្នាក់ពីបទរំលោភបំពានផ្លូវភេទលើកូនស្រីជំទង់ខ្លួនឯងចំនួន ២នាក់។ លោកស្រី​ Panadda ក៏ជាស្ថាបនិកមូលនិធិ​ Goodness ម្នាក់​បានដាក់ការចោទពាក្យបណ្តឹងទៅលោកវរសេនីយ៍ទោ​ Suthin Poompuang ជាអ្នកស៊ើបអង្កេត​ប្រចាំប៉ុស្តិប៉ូលិស​ Samrong Nua ។ ​​

លោកស្រីត្រូវបានអមដំណើរដោយបងប្អូនស្រីពីរនាក់​មានអាយុ ១៤ និង ១៥ឆ្នាំដែល​ជាសិស្ស​​នៅកម្រិតមធ្យមសិក្សាទុតិយភូមិនៃសាលាមួយក្នុងស្រុកមឿងខេត្ត​ Samut Prakan ។ក្មេងស្រីទាំងពីរនាក់រស់នៅជាមួយឪពុកក្នុងឃុំ tambon Samrong Nua​ នៃស្រុកមឿង។ ពួកគេទាំងពីរត្រូវឪពុកចាប់រំលោភហើយគម្រាមថានឹងធ្វើបាបប្រសិនបើឱ្យនរណាម្នាក់ដឹងរឿងនេះ។ លោកស្រី Panadda បានដឹងដំណឹងនេះតាមរយៈការប្តឹងមកពីសំណាក់ប្រជាជននៅតំបន់នោះកាលពីថ្ងៃទី៧ ខែមិថុនា។ លោកស្រីបានទាក់ទងទៅមន្ត្រីសន្តិសុខប្រចាំតំបន់ដែលជនរងគ្រោះរស់នៅ ធ្វើយ៉ាងណាឱ្យយកក្មេងស្រី​ទាំងពីរចេញពីផ្ទះកើតហេតុទៅកាន់កន្លែងមានសុវត្ថិភាពឱ្យបាន។ លើសពីនេះលោកស្រីបានស្នើសុំឱ្យប៉ូលិសចាប់ខ្លួននិងចាត់វិធានការតាមផ្លូវច្បាប់ចំពោះឪពុកចិត្តខ្មៅរូបនេះ។

រូបតំណាង

តាមប្រភពជនរងគ្រោះបានឱ្យដឹងថា ឪពុកម្នាក់នេះជាសន្តិសុខនៃសាលាអន្តរជាតិមួយ ហើយគាត់បានលែងលះជាមួយម្តាយជនរងគ្រោះហើយ។ ក្រោយលែងលះ កូនទាំងពីរត្រូវមករស់នៅខាងឪពុក។ នៅពេលពួកគេមានអាយុ ១២ឆ្នាំ​​ ឪពុករូបនេះចាប់ផ្តើមបៀតបៀនផ្លូវភេទ​ បូករួមទាំងការប្រើអំពើហឹង្សាទៅលើពួកគេទៀតផង។ កាលពីពេលថ្មីៗនេះក្មេងស្រីទាំងពីរបានដាច់ចិត្តស្វែងរកជំនួយពីអ្នកជិតខាងឱ្យជួយ។ ប៉ូលិសបានទទួលយកពាក្យបណ្តឹងសម្រាប់ការស៊ើបអង្កេតបន្ថែម។ បងប្អូនស្រីទាំងពីរត្រូវបានក្រុមគ្រូពេទ្យ​ពិនិត្យរាងកាយ ហើយ​មន្រ្តីសុខុមាលភាពសង្គមកំពុងកសាងសំណុំរឿង​​ក្នុងការចាប់ខ្លួនឪពុក។

កែសម្រួលដោយ៖ ភារ៉ា

ប្រភព៖ bangkok post

from： https://tnaot.com/km/m/detail/article/9358108