កាលពីព្រឹកថ្ងៃទី​៨ ខែមិថុនា ឆ្នាំ២០២០ លោក Lee Jae-yong ប្រធានក្រុមហ៊ុនអេឡិចត្រូនិកសាមសុង​​នៅកូរ៉េខាងត្បូង បានបង្ហាញខ្លួន​​នៅក្នុងសវនាការ​តុលាការ​​​ ទីក្រុងសេអ៊ូល​ ក្រោមការចោទប្រកាន់ចំនួន​២​បទល្មើសផ្សេងគ្នា ។

បណ្តាញទូរទស្សន៍​កូរ៉េខាងត្បូង Arirang បានផ្សាយថា លោក Lee Jae-yong បានរងចោទប្រកាន់បទល្មើស ទីមួយ គឺ​ទាក់ទង​ការច្របាច់បញ្ចូល​គ្នា​ដ៏ចម្រូងចម្រាស​​ កាលពីឆ្នាំ​២០១៥ ​រវាងក្រុមហ៊ុន Samsung C&T និងក្រុមហ៊ុន Cheil Industries ។

លោក Lee រងចោទប្រកាន់ថា មានឧបាយកលដោយចេតនា ​​ទម្លាក់តម្លៃភាគហ៊ុន​​ Samsung C&T ឲ្យធ្លាក់ចុះទាប និងបំប៉ោង​តម្លៃ​ភាគហ៊ុន Cheil Industries ក្នុង​គោលបំណង​ច្របាច់បញ្ចូល​គ្នា​​រវាង​ក្រុមហ៊ុនទាំងពីរនេះ​​ដោយមិនមានផលប៉ះពាល់ ។ 

លោក Lee ក៏នៅរងចោទប្រកាន់បន្ថែមទៀត ​ពីបទល្មើសបំប៉ោងតម្លៃ​ក្រុមហ៊ុនឱសថ Samsung Biologics តាមរយៈការបង្កើត​គណនីក្លែងបន្លំ​ផងដែរ ។ 

ការស៊ើបអង្កេត​បានចាប់ផ្តើម​​កើតឡើង​នៅក្នុងខែវិច្ឆិកា ឆ្នាំ២០១៨ នៅពេលដែល​គណៈកម្មការអនាគត និងមូលបត្រ ដែលស្ថិតនៅក្រោម​យុត្តាធិការ​របស់​គណៈកម្មាធិការសេវាកម្មហិរញ្ញវត្ថុ​កូរ៉េខាងត្បូងនោះ​ដាក់ពាក្យបណ្តឹងមួយ​ប្រឆាំង​ទៅលើ​ក្រុមហ៊ុន​ជីវសាស្ត្រ​​ Samsung Biologics ពីបទសង្ស័យ​ក្លែងបន្លំគណនី ។ 

រដ្ឋអាជ្ញា​កូរ៉េខាងត្បូង​ ចាប់ផ្តើម​ស៊ើបអង្កេត​រឿងក្តីនេះតាំងពីពេលនោះមក ដើម្បីដាក់បន្ទុកចោទប្រកាន់​ប្រឆាំង​ទៅលើ​​លោក Lee ។

សវនាការ​កាលពីព្រឹកថ្ងៃទី៨ ខែមិថុនា មានរយៈពេលជាច្រើន​ម៉ោង ដើម្បីសម្រេចថា តើត្រូវចេញ​ដីកាឃាត់ខ្លួន​លោក Lee Jae-yong ដែរឬយ៉ាងណា ។ លទ្ធផល​ត្រូវបានរំពឹងថា នឹងប្រកាស​នៅយប់ថ្ងៃទី​៨ ខែមិថុនា ឬនៅព្រឹកថ្ងៃទី៩ ខែមិថុនា​ ឆ្នាំ២០២០ ។ 

បើសិនតុលាការចេញដីកាឃាត់ខ្លួនលោក Lee Jae-yong មែននោះ គឺជាលើកទីពីរហើយ ក្នុងរយៈពេល​២៨ខែ ដែលលោក Lee ត្រូវបានតុលាការចាប់ខ្លួន ។ 

លោក Lee Jae-yong ធ្លាប់​បានជាប់ឃុំ​ប្រហែលមួយឆ្នាំ ពីបទប្រព្រឹត្តអំពើពុករលួយ ។ លោកបានរួចខ្លួន​កាលពីខែ​កុម្ភៈ ឆ្នាំ២០១៨ ៕ ប្រែសម្រួលដោយ៖ thach yat 

from： https://tnaot.com/km/m/detail/article/9349649