មេដឹកនាំកូរ៉េខាងជើង លោក គីម ជុងអ៊ុន បានដឹកនាំ​កិច្ចប្រជុំ​លើកទី១៣ របស់គណៈកម្មាធិការនយោបាយ​គណបក្ស​ពលករ​​​កូរ៉េ ដែលកំពុងកាន់អំណាចដឹកនាំប្រទេស​ ។ 

កិច្ចពិភាក្សារបស់គណៈកម្មាធិការនៅលើកនេះ បាន​ផ្តោត​ទៅលើអំពី​​គម្រោងសេដ្ឋកិច្ច និង​ឧស្សាហកម្ម​គីមី​។ នេះបើតាមការផ្សាយរបស់ប្រភព KCNA ដែលជាបណ្តាញព័ត៌មាន​គ្រប់គ្រង ដោយរដ្ឋ​កូរ៉េខាងជើង​​ កាលពីថ្ងៃទី​៨ ខែមិថុនា​ ឆ្នាំ២០២០។ 

ប្រភព​ព័ត៌មានដដែល បានបញ្ជាក់ថា កិច្ចពិភាក្សា​បានលើកឡើង អំពីបញ្ហាសំខាន់ៗជាច្រើន​ ក្នុងនោះ​មានដូចជា​ការអភិវឌ្ឍបន្ថែម​ទៅលើសេដ្ឋកិច្ចរបស់ប្រទេសជាតិ និងការលើក​កម្ពស់​ជីវភាពរបស់ប្រជាជន​កូរ៉េខាងជើង​ទាំងមូល ។ 

កិច្ចប្រជុំរបស់ការិយាល័យនយោបាយលើកទី១៣នេះ បានសង្កត់ធ្ងន់ម្តងហើយម្តងទៀតថា ឧស្សាហកម្មគីមីគឺ ជា “កម្លាំងរុញច្រានដ៏សំខាន់មួយដល់សេដ្ឋកិច្ចជាតិ” ។

ប្រភព KCNA បានដកស្រង់ប្រសាសន៍របស់លោក គីម ជុងអ៊ុន បានសង្កត់ធ្ងន់ទៅលើភាពចាំបាច់ ក្នុងការផ្តល់អាទិភាពខ្ពស់ដល់ការបង្កើនសមត្ថភាពផលិតជី ។ កិច្ចប្រជុំនេះ ក៏បានសង្កត់ធ្ងន់​ទៅលើការសាងសង់ផ្ទះជូនដល់ពលរដ្ឋ ដែលជាមធ្យោបាយមួយ ធ្វើឱ្យកម្រិតជីវភាពរបស់ប្រជាជនកូរ៉េខាងជើង មានភាពល្អប្រសើរឡើង។

កិច្ចប្រជុំមានរយៈពេលពីរថ្ងៃ កើតឡើងចំពេលមានភាពមិនប្រាកដប្រជា ផ្នែកសេដ្ឋកិច្ច ដ៏ដូចជាការរីករាលដាលជំងឺកូវីដ-១៩ ​នៅក្នុងប្រទេសនេះ ។​ កូរ៉េខាងជើង មិនមានប្រពភពព័ត៌មានផ្សាយ អំពីការឆ្លងរាតត្បាត​ពីវីរុស​កូវីដ​១៩នោះឡើយ ។ ជាមួយគ្នានេះដែរ កូរ៉េខាងជើង កំពុងរងនូវសម្ពាធបន្ថែមទៅលើសេដ្ឋកិច្ច តាមរយៈការដាក់ទណ្ឌកម្មជាអន្តរជាតិ ដោយមានគោលបំណងគាបសង្កត់​ប្រទេសនេះ ឲ្យបញ្ឈប់កម្មវិធីអាវុធនុយក្លេអ៊ែរ៕ ប្រែសម្រួលដោយ៖ thach yat 

from： https://tnaot.com/km/m/detail/article/9347560